धाराशिव : जिल्ह्यातील भुम आणि परंडा तालुक्यात घरफोडीच्या दोन घटना घडल्या. अज्ञात चोरट्यांनी घरांचे कुलूप तोडून सोन्याचे दागिने, रोख रक्कम, कपडे तसेच शेळी असा एकूण 1 लाख 90 हजार रुपयांचा मुद्देमाल चोरून नेला.
भुम तालुक्यातील वरुड येथे कांताबाई सुग्रीव भोसले (वय 55) यांच्या घराचे कुलूप 12 ऑक्टोबर रोजी सकाळी 8.30 ते सायंकाळी 5 वाजेच्या दरम्यान अज्ञात व्यक्तीने तोडले. घरात प्रवेश करून चोरट्याने 3 तोळे 3 ग्रॅम वजनाचे सोन्याचे दागिने आणि 55 हजार रुपये रोख असा एकूण 1 लाख 48 हजार रुपयांचा ऐवज लंपास केला. याप्रकरणी कांताबाई भोसले यांच्या फिर्यादीवरून भुम पोलीस ठाण्यात भा.न्या.सं. कलम 305, 331(3) अन्वये गुन्हा दाखल करण्यात आला आहे.
दरम्यान, परंडा तालुक्यातील आसू येथील मासाळ वस्तीवर गोपीचंद सोपान मासाळ (वय 65) यांच्या घरातही चोरी झाली. 12 ऑक्टोबर रोजी रात्री 10 ते 13 ऑक्टोबर रोजी पहाटे 2.30 वाजेच्या दरम्यान अज्ञात चोरट्यांनी घराचे कुलूप तोडून प्रवेश केला. यावेळी 10 ग्रॅम सोन्याचे दागिने, 9 इरकल, 12 नवीन साड्या, 4 नवीन धोतर, बैलाच्या गळ्यातील चंगाळी घंटी आणि एक शेळी असा एकूण 42 हजार रुपयांचा मुद्देमाल चोरीस गेला.
या प्रकरणी गोपीचंद मासाळ यांच्या फिर्यादीवरून परंडा पोलीस ठाण्यात भा.न्या.सं. कलम 305(ए), 331(4) अन्वये गुन्हा दाखल करण्यात आला असून, दोन्ही घटनांचा पोलीस तपास सुरू आहे.
