नळदुर्ग – तुळजापूर तालुक्यातील अणदूर येथे बेकायदेशीररीत्या विक्री केल्या जाणाऱ्या शिंदीमध्ये (ताडी) घातक गुंगीकारक औषध मिसळल्यामुळे ती पिऊन एका २५ वर्षीय तरुणाचा मृत्यू झाल्याची गंभीर घटना समोर आली आहे. सुरुवातीला अकस्मात मृत्यू म्हणून नोंद असलेल्या या प्रकरणाच्या सखोल तपासानंतर, संबंधित महिलेविरुद्ध नळदुर्ग पोलीस ठाण्यात सदोष मनुष्यवधाचा गुन्हा दाखल करण्यात आला आहे.
नेमकी घटना काय?
उमरगा येथील भारत नगर (मुळज रोड) येथील रहिवासी ईश्वर बाबू कल्लेमुळे (वय २५ वर्षे) व त्याचा मित्र गोविंद तुळशीराम विभुते हे दोघे ८ ऑगस्ट २०२५ रोजी दुपारी १.०० वाजेच्या सुमारास अणदूर (ता. तुळजापूर) येथील वत्सलानगर भागात गेले होते.
तेथे संशयित महिला प्रतीक्षा दयानंद भोसले ही बेकायदेशीररीत्या शिंदीची विक्री करत होती. दोघे तिच्या अड्ड्यावर शिंदी पिण्यासाठी गेले असता, संबंधित महिलेने शिंदीमध्ये अतिप्रमाणात गुंगीकारक औषध मिसळले होते. ही विषारी व गुंगीकारक शिंदी पिल्यामुळे ईश्वर कल्लेमुळे याला तीव्र चक्कर आली आणि तो जागीच बेशुद्ध पडला. उपचारापूर्वीच त्याचा दुर्दैवी मृत्यू झाला.
अकस्मात मृत्यूच्या तपासातून निष्पन्न झाला गुन्हा
घटनेनंतर नळदुर्ग पोलीस ठाण्यात सुरुवातीला अकस्मात मृत्यूची नोंद करण्यात आली होती. मात्र, शवविच्छेदन अहवाल आणि पोलिसांच्या सखोल तपासात ईश्वरचा मृत्यू शिंदीमध्ये जास्त प्रमाणात मिसळलेल्या गुंगीकारक औषधामुळेच झाल्याचे निष्पन्न झाले.
त्यानंतर मयताचे वडील बाबू लक्ष्मण कल्लेमुळे (वय ५२ वर्षे, रा. भारत नगर, मुळज रोड, उमरगा) यांनी १५ ऑक्टोबर २०२६ रोजी नळदुर्ग पोलीस ठाण्यात जाऊन रीतसर फिर्याद दिली. त्यांच्या प्रथम खबरेवरून पोलिसांनी संशयित महिलेविरुद्ध गुन्हा दाखल केला आहे:
-
आरोपी : प्रतीक्षा दयानंद भोसले (रा. वत्सलानगर, अणदूर, ता. तुळजापूर, जि. धाराशिव).
-
दाखल कलमे : भारतीय न्याय संहिता (BNS) कलम १०५ (सदोष मनुष्यवध) आणि १२३ (विषारी/गुंगीकारक पदार्थ देऊन इजा पोहोचवणे).
ग्रामीण भागात चालणाऱ्या बेकायदेशीर ताडी व शिंदी विक्रीच्या अड्ड्यांवर विषारी रसायने आणि औषधांचा सर्रास वापर होत असल्याचा प्रकार या घटनेमुळे पुन्हा चव्हाट्यावर आला असून, नळदुर्ग पोलीस या प्रकरणाचा पुढील तपास करत आहेत.
