तुळजाभवानी मंदिर ‘मटका किंग’ व्हीआयपी दर्शन प्रकरण: धार्मिक व्यवस्थापक अमोल भोसले निलंबित

तुळजापूर / धाराशिव: महाराष्ट्राची कुलस्वामिनी श्री तुळजाभवानी देवीच्या गाभाऱ्यात सोलापूरच्या कुख्यात मटका बुक्कीमालकाला बेकायदेशीर व्हीआयपी दर्शन घडवून आणल्याचे आणि बनावट पासेसद्वारे भाविकांची लूट केल्याचे प्रकरण आता चांगलेच तापले आहे. या गंभीर गैरप्रकाराची दखल घेत मंदिर प्रशासनाने मोठी कारवाई करत मंदिराचे धार्मिक व्यवस्थापक अमोल भोसले यांना तात्काळ निलंबित केले आहे. मात्र, या प्रकरणात थेट सहभागाचा आरोप असलेले महंत वाकोजीबुवा यांच्यावर अद्याप कोणतीही कारवाई न झाल्याने ‘त्यांच्यावर कारवाई कधी होणार?’ असा संतप्त सवाल भाविक आणि भोपे पुजारी मंडळाकडून उपस्थित केला जात आहे.

दोघांनाही बजावल्या होत्या नोटिसा

या संपूर्ण प्रकरणाची तीव्रता लक्षात घेऊन मंदिर संस्थानचे अध्यक्ष तथा जिल्हाधिकाऱ्यांच्या निर्देशानुसार चौकशी समिती स्थापन करण्यात आली होती. प्राथमिक चौकशीच्या आधारे धार्मिक व्यवस्थापक अमोल भोसले आणि महंत वाकोजीबुवा या दोघांनाही प्रशासनाकडून कारणे दाखवा नोटिसा बजावण्यात आल्या होत्या.

या नोटिशीनंतर प्रशासनाने तात्काळ पाऊल उचलत व्यवस्थापक अमोल भोसले यांच्यावर निलंबनाची कारवाई केली. मात्र, एकाच प्रकरणात दोघांवर आरोप असताना केवळ व्यवस्थापकावरच कारवाईचा बडगा का, आणि महंतांना अभय का दिले जात आहे, यावरून मंदिरात आणि शहरात जोरदार चर्चा सुरू झाली आहे.

नेमके प्रकरण काय?

सोलापूर येथील सराईत गुन्हेगारी पार्श्वभूमी असलेला, ज्याच्यावर तडीपारीसह गंभीर प्रतिबंधक कारवायांची नोंद आहे, असा अरुण प्रभाकर रोडगे उर्फ दादा रोडगे याने सर्व नियम धाब्यावर बसवून गाभाऱ्यात थेट प्रवेश मिळवला होता. हा प्रवेश महंत वाकोजीबुवा, आमदार राणाजगजितसिंह पाटील यांचे खाजगी सचिव सुधीर जमदाडे आणि तुळजापूरचे नगराध्यक्ष विनोद (पिटू) गंगणे यांच्या मदतीने व राजकीय दबावातून मिळवून देण्यात आल्याचा गंभीर आरोप ‘श्री तुळजाभवानी भोपे पुजारी मंडळा’ने केला आहे. सर्वसामान्य भाविक उन्हातान्हात तासनतास दर्शन रांगेत उभे असताना मटका चालकाला मिळालेल्या या ‘शाही व्हीआयपी’ वागणुकीमुळे राज्यभरातील भाविकांमधून तीव्र संताप व्यक्त होत आहे.

बनावट पासेसद्वारे परराज्यातील भाविकांची लूट

भोपे पुजारी मंडळाचे अध्यक्ष अमरराजे अंबादासराव कदम-परमेश्वर यांनी जिल्हाधिकारी आणि जिल्हा पोलीस अधीक्षकांकडे दिलेल्या तक्रारीत बनावट पासेसच्या मोठ्या रॅकेटचाही भांडाफोड केला आहे:

• चरणतीर्थ व प्रक्षाळ पूजेचा गैरवापर: नवरात्रोत्सवाच्या कालावधीत अत्यंत पवित्र मानल्या जाणाऱ्या चरणतीर्थ व प्रक्षाळ पूजेच्या वेळी परराज्यातील श्रीमंत भाविकांकडून मोठी रक्कम उकळून त्यांना थेट गाभाऱ्यात सोडण्यात आले.

• १४ ऑक्टोबरची घटना: १४ ऑक्टोबर रोजी रात्रीच्या आरतीनंतरही १५ ते २० धनदांडग्यांना बेकायदेशीररीत्या गाभाऱ्यात दर्शन घडवून आणल्याचे तक्रारीत नमूद आहे.

• सुरक्षेशी तडजोड: हा प्रकार केवळ नियमांचा भंग नसून देवीच्या ऐतिहासिक व मौल्यवान दागिन्यांच्या सुरक्षेशी केलेली गंभीर तडजोड आहे.

या प्रकरणी भारतीय न्याय संहिता (BNS) २०२३ मधील कलम ३१८ (फसवणूक), कलम ३३६/३४०, कलम ६१ तसेच भ्रष्टाचार प्रतिबंधक कायद्यान्वये फौजदारी गुन्हे दाखल करण्याची मागणी करण्यात आली आहे.

भाविक व पुजारी मंडळाच्या प्रमुख मागण्या

१. व्यवस्थापक अमोल भोसले यांच्या निलंबनानंतर आता या प्रकरणातील मुख्य सूत्रधार असलेले महंत वाकोजीबुवा यांच्यावरही तात्काळ निलंबन व फौजदारी कारवाई करण्यात यावी.

२. तुकोजीबुवा गंगणे महाराज, विशाल रोचकरी, सुधीर जमदाडे, विनोद पिटू गंगणे आणि संगनमत करणाऱ्या इतर अधिकाऱ्यांवर त्वरित एफ.आय.आर. (FIR) नोंदवावा.

३. १४ ऑक्टोबरच्या रात्री १० ते ११ वाजेदरम्यानचे तसेच नवरात्रातील चरणतीर्थ व प्रक्षाळ पूजेचे गर्भगृह आणि परिसरातील सीसीटीव्ही (CCTV) फुटेज जप्त करून फॉरेन्सिक तपास करावा.

४. बनावट पास छापणारी टोळी आणि त्यामागील आर्थिक गैरव्यवहारांची चौकशी सक्षम राज्य गुन्हे अन्वेषण शाखेकडून (CID) करण्यात यावी.

धार्मिक व्यवस्थापकाच्या निलंबनानंतर कारवाईचे पहिले पाऊल पडले असले, तरी महंत वाकोजीबुवा यांच्यासह राजकीय पदाधिकाऱ्यांवर पोलीस प्रशासन काय पावले उचलणार, याकडे आता संपूर्ण महाराष्ट्राचे लक्ष लागले आहे.