उमरगा – “तू आमच्याकडे सारखा रागाने का बघतोस?” या क्षुल्लक कारणावरून गैरकायद्याची मंडळी जमवून एका २४ वर्षीय तरुणावर कोयता, काठी आणि कमरेच्या बेल्टने बेदम मारहाण केल्याची घटना उमरगा शहरातील हमीदनगर भागात घडली आहे. मारहाणीदरम्यान फिर्यादीच्या गळ्यातील १ तोळ्याची सोन्याची चैन लंपास करून जीवे मारण्याची धमकी दिल्याप्रकरणी उमरगा पोलीस ठाण्यात ५ जणांविरुद्ध विविध गंभीर कलमांन्वये गुन्हा दाखल करण्यात आला आहे.
नेमकी घटना काय?
काळे प्लॉट, मोमीन गल्ली (उमरगा) येथील रहिवासी महेदी खुदाबक्ष हान्नुरे (वय २४ वर्षे) हे १३ ऑक्टोबर २०२६ रोजी रात्री ८.३० वाजेच्या सुमारास हमीदनगर परिसरात थांबले होते.
त्यावेळी काळे प्लॉट भागातील संशयितांनी गैरकायद्याची मंडळी जमवून महेदी यांना गाठले. “तू सारखेच आमच्याकडे रागाने का बघतोस?” असा जाब विचारत आरोपींनी अश्लील शिवीगाळ करण्यास सुरुवात केली. त्यानंतर आरोपींनी लाथाबुक्क्यांसह हातातील धारदार कोयता, लाकडी काठी आणि बेल्टने सपासप मारहाण करून त्यांना रक्तबंबाळ व जखमी केले.
या झटापटीदरम्यान फिर्यादी महेदी यांच्या गळ्यातील १ तोळा वजनाची सोन्याची चैन खाली पडली असता, आरोपींपैकी एकाने ती परस्पर उचलून चोरून नेली. “पुन्हा दिसलास तर तुला जिवंत मारून टाकू,” अशी उघड धमकी देत आरोपी तेथून निघून गेले.
उमरगा पोलिसांत पाच जणांवर गुन्हा नोंद
हल्ल्यात जखमी झालेल्या महेदी हान्नुरे यांच्यावर रुग्णालयात उपचार करण्यात आले. त्यांनी दिलेल्या वैद्यकीय जबाबावरून १६ ऑक्टोबर २०२६ रोजी उमरगा पोलीस ठाण्यात गुन्हा दाखल करण्यात आला:
-
आरोपी :
१) फयाज दस्तगीर पठाण
२) जुनेद जाफर शेख
३) समीर रुबाब शेख
४) यासीर खलील पठाण
५) पुरेकान महेबुब कुरेशी (सर्व रा. काळे प्लॉट, उमरगा, जि. धाराशिव)
-
दाखल कलमे : भारतीय न्याय संहिता (BNS) कलम ११८(१), ११५(२), ३५२, ३५१(२)(३), ३०३(२) (चोरी), १८९(२), १९० आणि १९१(२)(३).
शहरात रात्रीच्या सुमारास झालेल्या या हिंसक हल्ल्याचा आणि चोरीच्या घटनेचा पुढील तपास उमरगा पोलीस करत आहेत.
