धाराशिव – धाराशिव तालुक्यातील वडगाव सि. येथील जिल्हा परिषद शाळेच्या परिसरातून दोन १५ वर्षीय अल्पवयीन शाळकरी मित्रांचे अज्ञात व्यक्तीने अज्ञात कारणासाठी गुप्तपणे अपहरण केल्याची धक्कादायक घटना समोर आली आहे. दोन शाळकरी मुले अचानक बेपत्ता झाल्याने परिसरात एकच खळबळ उडाली असून, पालकांच्या फिर्यादीवरून धाराशिव शहर पोलीस ठाण्यात अज्ञाताविरुद्ध अपहरणाचा गुन्हा दाखल करण्यात आला आहे.
नेमकी घटना काय?
राघुचीवाडी येथील मूळ रहिवासी व सध्या बालाजी नगर (धाराशिव) येथे वास्तव्यास असलेले गंगाधर तानाजी तवार (वय ३९ वर्षे) यांचा मुलगा रितेश गंगाधर तवार (वय १५ वर्षे) आणि त्याचा मित्र युवराज श्रीकांत म्हेत्रे (वय १५ वर्षे, रा. वडगाव सि., ता. जि. धाराशिव) हे दोघे २४ ऑक्टोबर २०२६ रोजी सकाळी ९.३० वाजेच्या सुमारास वडगाव सि. येथील जिल्हा परिषद प्राथमिक शाळेजवळ उपस्थित होते.
त्यावेळी कोणीतरी अज्ञात व्यक्तीने या दोन्ही अल्पवयीन मुलांना अज्ञात कारणासाठी, स्वतःच्या ताब्यात गुप्तपणे आणि बेकायदेशीरपणे डांबून ठेवण्याच्या (परिरुद्ध करण्याच्या) उद्देशाने तिथून फूस लावून पळवून नेले. शाळा सुटण्याची वेळ उलटून गेल्यानंतरही मुले घरी परत न आल्याने कुटुंबीयांनी त्यांची सर्वत्र शोधाशोध केली. नातेवाईक आणि मित्रांकडे चौकशी करूनही दोघांचा काहीही थांगपत्ता न लागल्याने, त्यांचे कोणीतरी अपहरण केल्याची खात्री पालकांना पटली.
धाराशिव शहर पोलिसांत अपहरणाचा गुन्हा नोंद
मुलांचा शोध न लागल्याने अखेर वडील गंगाधर तवार यांनी २६ ऑक्टोबर २०२६ रोजी धाराशिव शहर पोलीस ठाण्यात धाव घेऊन तक्रार दाखल केली. त्यांच्या प्रथम खबरेवरून पोलिसांनी अज्ञात व्यक्तीविरुद्ध गुन्हा दाखल केला आहे:
-
अपहृत मुले :
१) रितेश गंगाधर तवार (वय १५ वर्षे, रा. बालाजी नगर, धाराशिव)
२) युवराज श्रीकांत म्हेत्रे (वय १५ वर्षे, रा. वडगाव सि., ता. जि. धाराशिव)
-
आरोपी : अज्ञात व्यक्ती.
-
दाखल कलम : भारतीय न्याय संहिता (BNS) कलम १३७(२) (अपहरण).
शाळेच्या परिसरातून एकाच वेळी दोन अल्पवयीन मुले बेपत्ता झाल्याने वडगाव सि. व धाराशिव परिसरात पालकांमध्ये तीव्र चिंता व्यक्त केली जात आहे. दोन्ही मुलांचा कसून शोध घेण्यासाठी तपास पथके रवाना करण्यात आली असून, धाराशिव शहर पोलीस या प्रकरणाचा पुढील सखोल तपास करत आहेत.
