जीपीएस लोकेशनच्या आधारे पोलिसांनी केला पाठलाग
पोलिसांनी दिलेल्या माहितीनुसार, ६ नोव्हेंबर २०२६ रोजी दुपारी एक वाजण्याच्या सुमारास बोर्डा (ता. कळंब) येथील रागिणी रमेश कानगे (वय २३) यांचे अपहरण करण्यात आले होते.
अभिजित उर्फ तन्या अर्जुन नवाट (रा. कोठाळवाडी), किरण भागवत तुपारे (रा. बोरगाव), अजय रामकिसन माने (रा. परळी रोड बायपास, कळंब) आणि अन्य एका व्यक्तीने संगनमत करून एमएच २० डीव्ही ०३५७ क्रमांकाच्या इर्टिगा वाहनातून अंबाजोगाई येथून येत तरुणीच्या घरात प्रवेश केला होता.
आरोपींनी तरुणीला जातीवाचक शिवीगाळ केली. कोयत्याचा धाक दाखवून जीवे मारण्याची धमकी दिली आणि जबरदस्तीने वाहनात बसवून दगडवाडी शिवारातील खडी केंद्राच्या दिशेने नेले होते.
या घटनेची फिर्याद दाखल होताच कळंब पोलीस ठाण्याचे पोलीस निरीक्षक शकील शेख यांच्या नेतृत्वाखाली पथक अपहृत तरुणीचा शोध घेण्यासाठी रवाना झाले.
आरोपींच्या वाहनातील जीपीएस यंत्रणेची माहिती घेऊन पोलीस निरीक्षक शकील शेख यांनी पथकाला सातत्याने लोकेशन दिले. त्यानुसार पोलिसांनी वाहनाचा पाठलाग केला आणि अखेर अंबाजोगाई येथील एका खदानीजवळ आरोपीच्या वाहनापर्यंत पोहोचले.
तरुणीला मारण्याचा प्रयत्न सुरू असताना पोलिसांची झडप
पोलिसांचे पथक घटनास्थळी पोहोचले, त्यावेळी वाहनात आरोपी तरुणीला मारण्याचा प्रयत्न करीत असल्याचे पोलिसांनी नमूद केले आहे. अशा गंभीर परिस्थितीत पोलीस हवालदार गणेश वाघमोडे (बक्कल क्रमांक १४६७) यांनी स्वतःच्या जीवाची पर्वा न करता प्रसंगावधान राखून आरोपीवर झडप घातली आणि त्याला ताब्यात घेतले.
या धाडसी कारवाईमुळे अपहृत तरुणीची सुटका करण्यात पोलिसांना यश आले.
वरिष्ठांच्या मार्गदर्शनाखाली पथकाची कामगिरी
ही कारवाई पोलीस अधीक्षक रितु खोखर, अपर पोलीस अधीक्षक सचिन पांडकर आणि उपविभागीय पोलीस अधिकारी संजय पवार यांच्या मार्गदर्शनाखाली करण्यात आली.
पोलीस निरीक्षक शकील शेख, पोलीस उपनिरीक्षक सिराज पठाण, पोलीस हवालदार गणेश वाघमोडे, पोलीस नाईक भाऊसाहेब पोळ, पोलीस कॉन्स्टेबल परमेश्वर कदम, आसाराम खाडे आणि अनिल भोसले यांच्या पथकाने ही कामगिरी केली.
या प्रकरणी भारतीय न्याय संहिता, शस्त्र अधिनियम तसेच अनुसूचित जाती-जमाती अत्याचार प्रतिबंधक कायद्यानुसार गुन्हा दाखल असून, पुढील तपास कळंब पोलीस करीत आहेत.
