धाराशिव : दिवाळीचा सण म्हणजे आनंद, उत्साह आणि प्रकाशाचा उत्सव! मात्र, याच प्रकाशोत्सवाच्या रात्री धाराशिव तालुक्यातील येडशी येथे एका कुटुंबाच्या आयुष्यात कायमचा अंधार पसरला. लक्ष्मीपूजनाच्या रात्री किराणा दुकानाला लागलेल्या भीषण आगीत एकाच कुटुंबातील सहा जणांचा गुदमरून आणि होरपळून दुर्दैवी मृत्यू झाला. या दुर्घटनेत कृष्णा करंडे हा २० वर्षीय तरुण मृत्यूच्या दाढेतून बचावला. गावकऱ्यांनी जीवाची बाजी लावून संपूर्ण कुटुंबाला वाचविण्याचा प्रयत्न केला; मात्र काळाने सहा जणांना हिरावून नेले. येडशीच्या इतिहासातील अत्यंत भीषण आणि हृदयद्रावक दुर्घटना म्हणून या घटनेकडे पाहिले जात आहे.
पहाटे अडीचच्या सुमारास आगीचा भडका
सोमवारी (दि. ९ नोव्हेंबर) पहाटे सुमारे २ ते २.३० वाजण्याच्या दरम्यान येडशी येथील करंडे गिफ्ट सेंटर व करंडे किराणा दुकानाला भीषण आग लागली. दुकानाच्या खालच्या मजल्यावर व्यवसाय, तर वरच्या मजल्यावर करंडे कुटुंबाचे वास्तव्य होते. लक्ष्मीपूजनाचा सण साजरा करून रात्री जेवण केल्यानंतर कुटुंबातील सदस्य झोपले होते. मध्यरात्री अचानक आग लागली आणि काही क्षणांतच आगीने रौद्ररूप धारण केले.
लक्ष्मीपूजनानिमित्त घरात लावलेल्या पणत्यांमुळे आग लागली असावी, अशी प्राथमिक शक्यता व्यक्त केली जात आहे. मात्र, आगीचे नेमके कारण अद्याप अधिकृतरीत्या स्पष्ट झालेले नाही. दुकानातील साहित्य आणि घरातील वस्तूंनी पेट घेतल्याने आगीची तीव्रता झपाट्याने वाढली. संपूर्ण दुकान आणि वरचे घर आगीच्या भक्ष्यस्थानी पडले.
बाहेर पडण्याच्या दरवाजाजवळच आग; सहा जणांचा गुदमरून मृत्यू
या दुर्घटनेतील सर्वाधिक धक्कादायक बाब म्हणजे घरातून बाहेर पडण्याचा मुख्य मार्ग असलेल्या समोरील भागातच आगीचा भडका उडाला. त्यामुळे घरातील सदस्यांना बाहेर पडण्याची संधीच मिळाली नाही. दाट धूर आणि प्रचंड उष्णतेमुळे घरातील व्यक्ती अडकून पडल्या. त्यांचा गुदमरून आणि होरपळून मृत्यू झाला.
या दुर्घटनेत घरातील तीन पिढ्यांचा अंत झाला. आजी-आजोबा, आई-वडील आणि दोन अल्पवयीन मुली अशा एकाच कुटुंबातील सहा जणांचा मृतांमध्ये समावेश आहे. घरातील सातपैकी कृष्णा करंडे हा एकमेव तरुण बचावला. त्याला उपचारासाठी रुग्णालयात दाखल करण्यात आल्याची माहिती आहे.
सहा जणांची नावे आणि वय
या भीषण दुर्घटनेत मृत्युमुखी पडलेल्यांची नावे पुढीलप्रमाणे आहेत.
१. उत्तम त्रिंबक करंडे (वय ७५)
२. चंद्रकला उत्तम करंडे (वय ७०)
३. गोविंद उत्तम करंडे (वय ४७)
४. ज्योती गोविंद करंडे (वय ४२)
५. गायत्री गोविंद करंडे (वय १६)
६. सिद्धी गोविंद करंडे (वय १५)
या दुर्घटनेतून कृष्णा करंडे हा २० वर्षीय तरुण बचावला. या घटनेने संपूर्ण करंडे कुटुंब उद्ध्वस्त झाले आहे.
पुण्यातून दिवाळीसाठी आलेली गायत्री; अखेरची दिवाळी ठरली!
या दुर्घटनेतील गायत्री करंडे ही पुण्यात शिक्षण घेत होती. दिवाळीचा सण कुटुंबासोबत साजरा करण्यासाठी ती नुकतीच येडशीला घरी आली होती. सणानिमित्त घरात आनंदाचे वातावरण होते. कुटुंबीयांसोबत दिवाळी साजरी करण्यासाठी आलेल्या गायत्रीची ही दिवाळी अखेरची ठरेल, याची कुणालाही कल्पना नव्हती.
कुटुंबातील अन्य सदस्यांसह गायत्री आणि तिची बहीण सिद्धी यांचाही या दुर्घटनेत दुर्दैवी अंत झाला. शिक्षण, स्वप्ने आणि भविष्याची उमेद असलेल्या दोन मुलींचा अशा प्रकारे झालेला मृत्यू मन सुन्न करणारा आहे.
मुलाला वाचविण्यासाठी पित्याचा अखेरपर्यंत संघर्ष?
या दुर्घटनेबाबत समोर आलेल्या माहितीनुसार, वडिलांनी मुलाचा जीव वाचविण्यासाठी अखेरपर्यंत प्रयत्न केले. स्वतःचा जीव धोक्यात घालून मुलाला वाचविण्याचा प्रयत्न केल्याची माहिती स्थानिकांकडून देण्यात आली आहे. मात्र, या प्रयत्नांत कुटुंबातील इतर सहा जणांना वाचवता आले नाही. या घटनेतील पित्याचा संघर्ष मन हेलावून टाकणारा आहे.
गावकऱ्यांचे शर्थीचे प्रयत्न; जेसीबीने भिंत फोडली
आग लागल्याचे समजताच येडशीतील नागरिकांनी घटनास्थळी धाव घेतली. कुटुंबातील सदस्यांना वाचविण्यासाठी गावकऱ्यांनी शर्थीचे प्रयत्न केले. बादल्यांनी पाणी टाकण्यात आले. परिसरातील बोअरवेल सुरू करून पाण्याचा मारा करण्यात आला. काही नागरिक घराच्या छतावर चढून आग विझविण्याचा प्रयत्न करीत होते.
घराच्या मागील बाजूनेही बचावकार्य करण्याचा प्रयत्न करण्यात आला. त्यासाठी जेसीबीच्या साहाय्याने भिंत फोडण्यात आली. मात्र, आतून कोणताही प्रतिसाद मिळाला नाही. आगीची तीव्रता इतकी प्रचंड होती की जवळ जाणेही कठीण झाले होते. गावकऱ्यांनी शक्य ते सर्व प्रयत्न केले; पण सहाही जणांचे प्राण वाचविण्यात अपयश आले.
एका ग्रामस्थाने व्यक्त केलेल्या भावना या घटनेचे गांभीर्य अधोरेखित करतात. ‘जळालेल्या दुकानाचे किंवा घराचे दुःख नाही, फक्त माणसं वाचायला पाहिजे होती. हे कुटुंब देवासारखं होतं. आम्ही त्यांना वाचविण्यासाठी खूप प्रयत्न केले; पण यश आले नाही,’ अशा शब्दांत त्यांनी आपली व्यथा मांडली.
घराचे काम अंतिम टप्प्यात; नव्या घरात राहायला जाण्यापूर्वीच काळाचा घाला
करंडे कुटुंब सध्या ज्या घरात राहत होते, त्याच्या मागील बाजूस त्यांनी नवीन घर बांधण्यास सुरुवात केली होती. या नवीन घराचे बांधकाम अंतिम टप्प्यात होते. लवकरच संपूर्ण कुटुंब नव्या घरात स्थलांतरित होणार होते. नव्या घरात सुखाने संसार करण्याची स्वप्ने पाहणाऱ्या या कुटुंबावर त्यापूर्वीच काळाने घाला घातला.ज्या घरात नव्या आयुष्याची स्वप्ने रंगवली जात होती, त्याच घराच्या परिसरात काही क्षणांत होत्याचे नव्हते झाले.
आगीची भीषणता; झाडेही जळून खाक
या आगीची तीव्रता किती भयंकर होती, याची कल्पना घटनास्थळावरील परिस्थितीवरून येते. दुकान आणि घर जळून खाक झालेच; शिवाय घरासमोरील उंच पिंपळाचे झाड खोडापासून शेंड्यापर्यंत पूर्णपणे करपले. नारळाचे उंच झाडही आगीत जळून खाक झाले. आगीचे लोळ आणि उष्णता किती तीव्र होती, हे यावरून स्पष्ट होते.
अग्निशमन दलाच्या प्रतिसादावर ग्रामस्थांचे प्रश्न
आगीची माहिती मिळाल्यानंतर अग्निशमन दल घटनास्थळी पोहोचण्यास उशीर झाल्याचा आरोप काही ग्रामस्थांनी केला आहे. तसेच अग्निशमन दलाच्या कर्मचाऱ्यांकडे धुरात प्रवेश करण्यासाठी आवश्यक मास्क नव्हते, त्यामुळे बचावकार्यावर मर्यादा आल्याचेही ग्रामस्थांचे म्हणणे आहे.
दुर्घटनेची सखोल चौकशी करून पीडितांना मदत द्या
या भीषण दुर्घटनेनंतर लोकप्रतिनिधींनी घटनास्थळी भेट देऊन पाहणी केली आणि पीडित कुटुंबाला शासनाकडून तातडीची आर्थिक मदत व पुनर्वसनासाठी सहकार्य करण्याची मागणी केली आहे. आगीचे नेमके कारण शोधण्यासाठी सखोल चौकशी व्हावी, तसेच अशा दुर्घटना भविष्यात घडू नयेत यासाठी आवश्यक उपाययोजना कराव्यात, अशी अपेक्षा व्यक्त होत आहे.
ऐन दिवाळीत येडशीवर शोककळा
दिवाळीच्या दिवशी घराघरांत दिव्यांची रोषणाई होती. मात्र, येडशीतील करंडे कुटुंबाच्या घरात लागलेल्या आगीने सहा जणांचे आयुष्य हिरावून घेतले. गावकऱ्यांच्या डोळ्यांत अश्रू आहेत. एका हसत्या-खेळत्या कुटुंबाचा असा अंत झाल्याने संपूर्ण येडशी गावावर शोककळा पसरली आहे.
एकीकडे दिवाळीचा प्रकाशोत्सव आणि दुसरीकडे करंडे कुटुंबाच्या आयुष्यात पसरलेला कायमचा अंधार, ही घटना मन सुन्न करणारी आहे. या दुर्घटनेतील सहाही मृतात्म्यांना भावपूर्ण श्रद्धांजली!
