धाराशिव : शेत रस्त्यावर माती का पसरवत आहात, अशी विचारणा केल्याच्या रागातून एका ६६ वर्षीय वृद्ध शेतकऱ्यासह त्यांच्या पुतण्याला शिवीगाळ करत लाथाबुक्क्यांनी, लाकडी काठी आणि दगडाने मारहाण करून गंभीर जखमी केल्याची घटना धाराशिव तालुक्यातील सारोळा बुद्रुक येथे घडली आहे. याप्रकरणी धाराशिव ग्रामीण पोलीस ठाण्यात गावातीलच तीन संशयित आरोपींविरुद्ध गुन्हा दाखल करण्यात आला आहे.
मिळालेल्या माहितीनुसार, सारोळा बु. (ता. जि. धाराशिव) येथील रहिवासी जयंत बलभीम रणदिवे (वय ६६ वर्षे) आणि त्यांचा पुतण्या हे १७ नोव्हेंबर रोजी सायंकाळी ५:३० ते ६:०० वाजेच्या सुमारास सारोळा बु. शिवारातील शेत गट क्रमांक ४१२ मध्ये असताना हा प्रकार घडला. यावेळी गावातीलच संशयित आरोपी सचिन चंद्रसेन उमाप, प्रविण चंद्रसेन उमाप आणि संतोष घोरपडे (सर्व रा. सारोळा बु., ता. जि. धाराशिव) यांना जयंत रणदिवे यांनी “शेत रस्त्यावर माती का पसरवत आहात?” अशी विचारणा केली.
याच कारणावरून चिडलेल्या तिन्ही आरोपींनी संगनमत करून जयंत रणदिवे आणि त्यांच्या पुतण्याला अर्वाच्य भाषेत शिवीगाळ करण्यास सुरुवात केली. वाद विकोपाला गेल्यानंतर आरोपींनी दोघांना लाथाबुक्क्यांसह काठी आणि दगडाने बेदम मारहाण केली. या हल्ल्यात दोघेही गंभीर जखमी झाले असून, आरोपींनी त्यांना जीवे ठार मारण्याची धमकीही दिली.
उपचारानंतर जयंत रणदिवे यांनी २० नोव्हेंबर रोजी धाराशिव ग्रामीण पोलीस ठाण्यात धाव घेऊन फिर्याद दिली. त्यांच्या तक्रारीवरून पोलिसांनी सचिन उमाप, प्रविण उमाप आणि संतोष घोरपडे या तिघांविरुद्ध भारतीय न्याय संहिता (BNS) कलम ११७(२) (गंभीर दुखापत करणे), ११५(२) (स्वेच्छेने दुखापत करणे), ३५२ (शांतता भंग करण्याच्या उद्देशाने अपमान), ३५१(२), (३) (जीवे मारण्याची धमकी) आणि ३(५) (समान उद्देशाने एकत्रित गुन्हा करणे) अन्वये गुन्हा नोंदवला आहे. या प्रकरणाचा पुढील तपास धाराशिव ग्रामीण पोलीस करत आहेत.




