तुळजापूर: महाराष्ट्राची कुलस्वामिनी आई तुळजाभवानी मातेचा शारदीय नवरात्र महोत्सव सध्या सुरू आहे. यानिमित्ताने राज्यासह देशभरातून भाविक मोठ्या संख्येने दर्शनासाठी येत आहेत. दररोज किमान तीन ते पाच लाख भाविक तुळजाभवानीच्या चरणी हजेरी लावत असल्याने तुळजापूरकडे जाणाऱ्या प्रमुख तिन्ही रस्त्यांवर वाहतुकीची प्रचंड कोंडी झाली आहे. धाराशिव, लातूर आणि नळदुर्गकडून येणाऱ्या रस्त्यांवर वाहनांच्या लांबच लांब रांगा लागल्या आहेत.
या वाहतूक कोंडीमुळे भाविकांना तासन्तास प्रवास करावा लागत आहे. त्यातच गेल्या २४ तासांत धाराशिव-तुळजापूर, तुळजापूर-लातूर आणि नळदुर्ग-तुळजापूर या तिन्ही रस्त्यांवर पाच ते सहा अपघात झाले आहेत. या अपघातांमध्ये तीन भाविकांना जीव गमवावा लागला असून, चार जण किरकोळ जखमी झाले आहेत.
पोलिसांचा बंदोबस्त असूनही अपघात आणि सुरक्षेचा प्रश्न गंभीर
तुळजापूरकडे येणाऱ्या वाहनांची संख्या लक्षात घेऊन, तिन्ही रस्त्यांवर पोलिसांचे फिक्स पॉइंट लावण्यात आले आहेत. मात्र, अनेक ठिकाणी पोलीस कर्तव्य बजावताना दिसत नसल्याच्या तक्रारी आहेत. काही ठिकाणी तर पोलीस गायब असल्याचे चित्र आहे. यामुळे वाहतूक कोंडी आणि अपघातांचे प्रमाण वाढत असल्याची भीती व्यक्त केली जात आहे.
पोलीस अधीक्षक संजय जाधव यांनी अशा कामचुकार पोलिसांवर कडक कारवाई करण्याचे निर्देश दिले आहेत. तसेच, नवरात्र काळात चोख पोलीस बंदोबस्त ठेवण्याचे आदेशही त्यांनी दिले आहेत.
चोऱ्या आणि जुगाराचा सुळसुळाट
तुळजापूर शारदीय नवरात्र महोत्सवात चोऱ्यांचे प्रमाण वाढले आहे. तसेच, टायगर जुगारही राजरोस सुरू असल्याचे वृत्त आहे. याबाबतच्या बातम्या धाराशिव लाइव्हने प्रसिद्ध केल्यानंतर पोलीस खडबडून जागे झाले आहेत. अवैध धंदे बंद करण्याचे आदेश देण्यात आले असून, पोलिसांनी यावर कारवाई सुरू केली आहे.
भाविकांना आवाहन
पोलीस प्रशासनाने भाविकांना वाहतूक नियमांचे पालन करण्याचे आणि गर्दीच्या ठिकाणी विशेष काळजी घेण्याचे आवाहन केले आहे. तसेच, कोणत्याही संशयास्पद व्यक्ती किंवा घटना आढळल्यास तात्काळ पोलिसांना संपर्क साधण्याचे आवाहनही करण्यात आले आहे.
