तुळजापूर विधानसभा मतदारसंघात आज असा काही सीन घडला की, थेट सिनेमाची कथा वाटावी! तीन उमेदवारी अर्ज दाखल झालेत, पण लक्ष वेधून घेतलंय चक्क ९० व्या वर्षात प्रवेश केलेल्या मधुकरराव चव्हाणांनी! एक नव्हे, तर दोन अर्ज दाखल करून चव्हाणांनी सगळ्यांना चक्रावून टाकलंय.
आता या वयात निवडणुकीची शपथ घेतली पाहिजे, तर चव्हाणसाहेब म्हणतात, “शपथ कसली, मी पाच वेळा निवडून आलोय, माझी प्रतिमा आहे, शपथ माझ्या नावातच आहे!” पण निवडणूक निर्णय अधिकारीसुद्धा या नाट्याला नक्की काय करावं, याचं उत्तर शोधत बसलेत.
तुळजापूरमध्ये २०१९ मध्ये रणांगण पेटलं होतं, तेव्हा भाजपच्या राणा जगजितसिंह पाटील यांनी चव्हाणसाहेबांना घरचा रस्ता दाखवला होता. पण चव्हाणांचं मन असं कुठे निवृत्तीला तयार होणार? काँग्रेसकडून तिकीट मिळेल का, यावर शंका असताना सुद्धा, चव्हाण साहेबांनी आपल्या दमदार ‘बंडखोरी’च्या फॉर्मात दोन अर्ज टाकून दाखवलेत.
आता खरा प्रश्न आहे, ४ नोव्हेंबरला ते अर्ज परत घेणार की बंडखोरीचा झेंडा उभारणार? काहीही असलं, निवडणूक लढण्याचा जोश अजूनही ९० वर्षांच्या चव्हाणांच्या नसांमध्ये ठणकत आहे, हे मात्र नक्की!
