धाराशिव झेडपी सत्तानाट्य: अखेर मुहूर्त ठरला! १३ मार्चला अध्यक्ष-उपाध्यक्ष निवड

धाराशिव: गेल्या महिनाभरापासून रंगलेल्या धाराशिव जिल्हा परिषदेच्या सत्तानाट्याला आता निर्णायक वळण मिळाले आहे. अध्यक्ष आणि उपाध्यक्ष पदाची निवड अखेर १३ मार्च रोजी होणार असल्याचे निश्चित झाले आहे. या निवडणुकीच्या पार्श्वभूमीवर धाराशिवमधील शिवसेनेच्या सर्व प्रमुख नेत्यांनी राज्याचे उपमुख्यमंत्री एकनाथ शिंदे यांची घेतलेली भेट अत्यंत महत्त्वपूर्ण मानली जात आहे.

उपमुख्यमंत्र्यांच्या दरबारात सर्व नेते एकवटले

जिल्हा परिषद अध्यक्ष निवडीचा तिढा सोडवण्यासाठी आणि पुढील रणनीती ठरवण्यासाठी दिग्गज नेत्यांनी उपमुख्यमंत्री एकनाथ शिंदे यांची भेट घेतली. या महत्त्वपूर्ण बैठकीला खालील प्रमुख नेते उपस्थित होते:

• प्रताप सरनाईक (धाराशिवचे पालकमंत्री)

• तानाजी सावंत (माजी आरोग्य मंत्री)

• ज्ञानराज चौगुले (माजी आमदार)

• रवींद्र गायकवाड (माजी खासदार)

शिवसेना ‘अभेद्य’; उपमुख्यमंत्र्यांचा निर्णय अंतिम

या बैठकीतील सर्वात मोठी घडामोड म्हणजे, धाराशिव जिल्ह्यातील शिवसेना पूर्णपणे ‘अभेद्य’ आणि एकसंध असल्याचा स्पष्ट संदेश या नेत्यांनी दिला आहे. उपमुख्यमंत्री एकनाथ शिंदे जो निर्णय घेतील, तो आम्हा सर्वांना मान्य असेल,” अशी ग्वाही या सर्वच नेत्यांनी एकमुखाने दिली आहे. यामुळे शिवसेनेत कुठलीही गटबाजी नसल्याचे स्पष्ट झाले आहे.

अफवांना पूर्णविराम आणि विरोधकांच्या मनसुब्यांवर पाणी

गेल्या काही दिवसांपासून आ. तानाजी सावंत गटाला जाणीवपूर्वक वगळून, शिवसेनेच्या दुसऱ्या गटाच्या ( रवींद्र गायकवाड, ज्ञानराज चौगुले गट ) मदतीने भाजपचाच अध्यक्ष बसवण्याच्या हालचाली सुरू असल्याच्या बातम्या पसरवल्या जात होत्या. तसेच, धाराशिव शिवसेनेत दोन गट पडल्याच्या वावड्याही (विशेषतः भाजप आमदार राणा पाटील यांच्या गोटातून) उठवल्या गेल्या होत्या. मात्र, कालच्या या एकजुटीच्या भेटीमुळे या सर्व खोट्या चर्चा आणि अफवांना कायमचा पूर्णविराम मिळाला आहे.

आता १३ मार्च रोजी होणाऱ्या निवडणुकीत उपमुख्यमंत्री एकनाथ शिंदे कोणाच्या नावाला पसंती देतात आणि महायुतीचा धर्म पाळताना नेमका कोणता फॉर्म्युला ठरतो, याकडे संपूर्ण जिल्ह्याचे लक्ष लागून आहे.

शिवसेना पक्षाच्या गटनेतेपदी संदेश उर्फ विकी चव्हाण यांची निवड

धाराशिव : जिल्हा परिषदेत शिवसेना पक्षाच्या गटनेतेपदी संदेश उर्फ विकी चव्हाण यांची निवड करण्यात आली असून आता जिल्हा परिषद अध्यक्षपदावर दावा करण्याची तयारी शिवसेनेने सुरू केली आहे. आमदार प्रा. डॉ. तानाजीराव सावंत यांच्या पुढाकाराने चव्हाण यांची गटनेतेपदी निवड करण्यात आली. या निवडीमुळे अध्यक्षपदाच्या निवडीत सावंत यांचे पारडे जड झाल्याचे राजकीय वर्तुळात बोलले जात आहे.

गटनेते म्हणून संदेश उर्फ विकी चव्हाण हे शिवसेना पक्षाचा व्हीप जारी करणे तसेच पक्षाची ध्येयधोरणे सभागृहात राबविण्याची जबाबदारी पार पाडणार आहेत. निवडीच्या वेळी शिवसेना पदाधिकारी व कार्यकर्ते मोठ्या संख्येने उपस्थित होते.

जिल्हा परिषद निवडणुकीत शिवसेनेने 23 जागांवर उमेदवार उभे केले होते, त्यापैकी 15 जागांवर विजय मिळवला. यात सावंत गटाच्या 8 तर माजी खासदार गायकवाड आणि चौगुले गटाच्या 7 जागांचा समावेश आहे. दोन उमेदवारांचा कल भाजपकडे झुकल्याची चर्चा होती. ते भाजपसोबत सहलीला गेल्याचीही माहिती होती, मात्र नंतर त्यांना परत आणण्यात आले.सावंत गटातील गटनेत्याची निवड झाल्याने अध्यक्षपदाच्या निवडीचा मार्ग मोकळा झाल्याचे मानले जात आहे.