धाराशिव: जिल्हा परिषदेतील अधिकाऱ्यांच्या कथित दिरंगाईमुळे पती-पत्नी आश्रमशाळा कर्मचाऱ्यांना त्यांचे वेतन मिळत नसल्याने त्यांनी जिल्हाधिकारी कार्यालयासमोर आमरण उपोषण सुरू केले आहे. आज उपोषणाचा सहावा दिवस असून पत्नी सुवर्णा यांची प्रकृती चिंताजनक बनली आहे.
तुळजापूर तालुक्यातील मंगरूळ येथील संत गाडगेबाबा माध्यमिक आश्रम शाळेत योगेंद्र भीमसिंग गिरासे हे अधीक्षक तर त्यांच्या पत्नी सुवर्णा दिलीपसिंग राजपूत या प्रयोगशाळा परिचर म्हणून कार्यरत आहेत. १८ ऑक्टोबर २०२३ पासून योगेंद्र यांचे तर १ एप्रिल २०२४ पासून सुवर्णा यांचे मस्टरवरील सह्या बंद करण्यात आल्या आहेत. त्यामुळे त्यांना २०२०-२१ पासून वेतन मिळालेले नाही.
या प्रकरणी सोलापूर येथील शाळा न्यायाधिकरणाने दोघांनाही रुजू करून घेण्याचे आणि वेतन अदा करण्याचे आदेश दिले आहेत. मात्र, शाळेचे मुख्याध्यापक आणि जिल्हा परिषदेतील समाजकल्याण विभागाचे अधिकारी या आदेशाची अंमलबजावणी करत नसल्याचा आरोप गिरासे दाम्पत्याने केला आहे.
न्यायालयाच्या आदेशाची अवमानना होत असतानाही प्रशासनाकडून कोणतीही कारवाई होत नसल्याने गिरासे दाम्पत्य हवालदिल झाले आहे. त्यांच्यासोबत असलेल्या चिमुकल्याची प्रकृतीही खालावल्याने त्याला इतरत्र हलविण्यात आले आहे. मात्र, सुवर्णा यांची प्रकृती चिंताजनक असूनही अधिकारी याकडे दुर्लक्ष करत आहेत.
गिरासे दाम्पत्याने महाराष्ट्र खाजगी शाळातील कर्मचारी सेवेच्या शर्ती विनिमय अधिनियम १९७७ आणि महाराष्ट्र खाजगी (सेवेच्या शर्ती) नियमावली १९८१ च्या तरतुदीनुसार त्यांना कायमस्वरूपी कर्मचारी म्हणून घोषित करून वेतन देण्यात यावे, अशी मागणी केली आहे.
या घटनेमुळे जिल्हा परिषदेतील अधिकाऱ्यांच्या कार्यपद्धतीवर प्रश्नचिन्ह निर्माण झाले आहे. प्रशासनाने या प्रकरणी तातडीने लक्ष घालून गिरासे दाम्पत्याला न्याय द्यावा, अशी मागणी होत आहे.
