नळदुर्ग – प्राण्यांना निर्दयपणे वागणूक देऊन त्यांची अवैध विल्हेवाट लावणाऱ्यांविरुद्ध नळदुर्ग पोलिसांनी मोठी कारवाई केली आहे. कत्तलीच्या उद्देशाने चारा-पाण्याची कोणतीही व्यवस्था न करता ७ गोवंशीय जनावरांना निर्दयतेने झाडाला बांधून ठेवल्याप्रकारणी पोलिसांनी तिघांविरुद्ध गुन्हा दाखल केला आहे.
नेमकी घटना काय?
मिळालेल्या माहितीनुसार, रविवार दि. ८ मार्च २०२६ रोजी सकाळी ६:१५ वाजण्याच्या सुमारास नळदुर्ग येथील कुरेशी गल्ली जवळील मोकळ्या जागेत काही जनावरे बेकायदेशीररीत्या बांधून ठेवल्याची माहिती पोलिसांना मिळाली होती. पोलिसांनी सदर ठिकाणी छापा टाकला असता, तेथील झाडाझुडपांमध्ये बाभळीच्या झाडाला ७ गोवंशीय जातीची जनावरे अत्यंत निर्दयतेने बांधलेली आढळली.
या जनावरांच्या चारा आणि पाण्याची कोणतीही सोय करण्यात आली नव्हती. ही सर्व जनावरे कत्तलीसाठी नेण्याच्या उद्देशाने तिथे डांबून ठेवल्याचे तपासात समोर आले आहे. जप्त करण्यात आलेल्या या ७ जनावरांची एकूण किंमत ७२,००० रुपये इतकी आहे.
आरोपींची नावे:
या प्रकरणी नळदुर्ग पोलिसांनी खालील व्यक्तींविरुद्ध गुन्हा नोंदवला आहे:
१. मुबीन अजीज कुरेशी (रा. कुरेशी गल्ली, नळदुर्ग)
२. अब्दुल अलीम अब्दुल रशीद कुरेशी (रा. कुरेशी गल्ली, नळदुर्ग)
३. अहमद इनामदार (रा. काझी गल्ली, नळदुर्ग)
पोलिसांनी सरकारतर्फे फिर्यादी होऊन नमूद आरोपींविरुद्ध प्राण्यांना क्रूरतेने वागवण्यास प्रतिबंध अधिनियम कलम ११(१)(एच), ११(१)(आय) सह पशु संरक्षण अधिनियम कलम ५ आणि ९ अन्वये गुन्हा दाखल केला आहे. या प्रकरणाचा पुढील तपास नळदुर्ग पोलीस करत आहेत.
आंबी पोलिसांची कारवाई; गोवंशीय मांसाची अवैध विक्री करणाऱ्यावर गुन्हा दाखल
आंबी- धाराशिव जिल्ह्यातील परंडा तालुक्यातील शेळगाव ते पांढरेवाडी रस्त्यावर गोवंशीय जनावरांची निर्दयपणे कत्तल करून मांस विक्री व वाहतूक करणाऱ्या एका इसमावर आंबी पोलिसांनी कारवाई केली आहे. या कारवाईत पोलिसांनी २७,५०० रुपये किमतीचे मांस जप्त केले असून आरोपीविरुद्ध गुन्हा दाखल केला आहे.
रविवार, ८ मार्च २०२६ रोजी सकाळी ११:४५ ते रात्री ९:०० वाजेच्या दरम्यान ही कारवाई करण्यात आली. आंबी पोलिसांना मिळालेल्या गुप्त माहितीनुसार, शेळगाव ते पांढरेवाडी रोडवरील रेवण दत्तोबा गांगुर्डे यांच्या शेताजवळ गोवंशीय जातीच्या जनावराची निर्दयपणे कत्तल करण्यात आली होती.
पोलिसांनी घटनास्थळी धाड टाकली असता, आरोपी सलीम गफार कुरेशी (राहणार कुह्राड गल्ली, परंडा) हा १२ किलो गोवंशीय मांस (किंमत अंदाजे २७,५०० रुपये) जवळ बाळगून त्याची बेकायदेशीररीत्या वाहतूक व विक्री करण्याच्या तयारीत असताना मिळून आला.
या प्रकरणी आंबी पोलिसांनी सरकारतर्फे फिर्यादी होऊन आरोपी सलीम कुरेशी याच्याविरुद्ध महाराष्ट्र पशु संरक्षण अधिनियम कलम ५(क) आणि ९(अ) अन्वये गुन्हा नोंदवला आहे. जप्त केलेले मांस आणि पुढील तपास आंबी पोलीस ठाण्याचे अधिकारी करत आहेत.
