धाराशिव, सोलापूर सीमेवर वाघाची दहशत कायम

धाराशिव – येडशी अभयारण्यातून बाहेर पडलेला वाघ अद्यापही धाराशिव आणि सोलापूर जिल्ह्यातील बार्शी तालुक्याच्या सीमेवर मुक्त संचार करीत आहे. चार दिवसांपूर्वी पांढरी (ता. बार्शी) येथे एका गाईवर हल्ला केल्यानंतर वाघाची उपस्थिती लक्षात आली होती. त्यानंतर येडशी अभयारण्यात ट्रॅप कॅमेऱ्यात कैद झाल्यानंतर आता तो बार्शी तालुक्यातील ढेंबरेवाडी तलावाच्या परिसरात दिसून आला आहे.

वाघाच्या संचारामुळे परिसरातील नागरिकांमध्ये भीतीचे वातावरण पसरले आहे. वाघाला पकडून यवतमाळच्या टिपेश्वर अभयारण्यात सोडण्याची मागणी आमदार कैलास पाटील यांनी केली आहे.

वनविभाग काय करत आहे?

वनविभागाचे तीन तालुक्यांतील अधिकारी १५ ट्रॅप कॅमेऱ्यांच्या सहाय्याने वाघाच्या हालचालींवर लक्ष ठेवून आहेत. वाघ गावात शिरू नये यासाठी खबरदारी घेतली जात आहे. सध्या वाघाला पकडण्याचे आदेश नसल्याने केवळ त्याच्या हालचालींवर लक्ष ठेवले जात आहे, असे धाराशिवचे विभागीय वन अधिकारी बी. ए. पोळ यांनी सांगितले.

नागरिकांना खबरदारी घेण्याचे आवाहन

वनविभागाने नागरिकांना घाबरून न जाता खबरदारी घेण्याचे आवाहन केले आहे. पाळीव प्राण्यांना बंदिस्त गोठ्यात बांधावे, जनावरांना चारण्यासाठी नेऊ नये, अशा सूचना देण्यात आल्या आहेत. वाघाचा हल्ला झाल्यास बचाव कसा करावा यासाठी सोलापूर आणि धाराशिवच्या रेस्क्यू टीमला प्रशिक्षण देण्यात आले आहे.