धाराशिव – येथील विशेष न्यायालयाने अल्पवयीन मुलीवर बलात्कार केल्याप्रकरणी आरोपी हकीम काझी याला 10 वर्षे सक्तमजुरी आणि 21,000 रुपये दंडाची शिक्षा सुनावली आहे. आरोपीने पीडित मुलीला तिच्या अल्पवयीन असल्याचा गैरफायदा घेत तिच्याशी जवळीक साधण्याचा प्रयत्न केला होता. घटनेच्या दिवशी आरोपीने पीडित मुलीला फूस लावून हुमनाबाद येथे नेले आणि तिथे तिच्यावर लैंगिक अत्याचार केले. आरोपीने पीडित मुलीला 26 मे 2019 पर्यंत रूममध्ये ठेवले आणि त्या दरम्यान तिच्यावर वारंवार लैंगिक अत्याचार केले. पीडित मुलीच्या आईने आरोपीविरुद्ध तक्रार दाखल केल्यानंतर पोलिसांनी आरोपीला अटक केली.
सरकार पक्षाने या प्रकरणात 11 साक्षीदार तपासले. पीडित मुलीची साक्ष, मुख्याध्यापकाची साक्ष आणि वैद्यकीय अधिकाऱ्यांची साक्ष या प्रकरणात महत्त्वपूर्ण ठरल्या. आरोपी हा विवाहित असून त्याला तीन मुले आहेत. विशेष न्यायाधीश श्रीमती टी. जी. मिटकरी यांनी आरोपीला भारतीय दंड संहिता आणि बाल लैंगिक अत्याचार प्रतिबंधक कायद्याच्या कलमान्वये शिक्षा सुनावली. आरोपीला सर्व शिक्षा एकत्रित भोगाव्या लागणार आहेत.
या प्रकरणाचा सविस्तर तपशील
सदर प्रकरणाची थोडक्यात हकीकत की, घटनेच्या दोन वर्षापूर्वीपासून आरोपी व पीडितेचे कुटुंब एकत्र ऊसतोड कामगार म्हणून विविध ठिकाणी काम करीत होते. दरम्यानच्या काळात आरोपीने पीडितेस तिच्या अल्पवयीन असल्याचा गैरफायदा घेऊन पिडीतेशी जवळीक साधण्याचा प्रयत्न केला. ऊस तोडीचे काम संपल्यानंतर आरोपीने पीडितेस व तिच्या आईस एका बांधकाम मिस्त्रीकडे मजूर म्हणून काम मिळवून दिले. सदर घटनेच्या दिवशी दिनांक ०७.०५.२०१९ रोजी पिडीत ही एकटी बांधकामाच्या कामावर जात असताना आरोपी हकीम काझी याने आज बांधकामावर काम नाही, दुसरीकडे काम आहे असे म्हणून त्याच्या अपसिंगा येथील शेतात घेऊन गेला व त्यानंतर तिथून बसने हुमनाबाद येथे घेऊन गेला, तेथे गेल्यानंतर येथे माझ्या ओळखीचे खूप लोक आहेत असे म्हणून तिला बुरखा घालण्यास दिला व तेथून जहीराबाद येथे घेऊन गेला. त्या ठिकाणी आरोपीने पीडितेस आरोपीच्या लहान मुलासोबत रूमवर दिनांक २६.५.२०१९ रोजी पर्यंत ठेवले त्या दरम्यानच्या काळात आरोपीने पीडितेवर वारंवार लैंगिक अत्याचार केले. दिनांक ०७.०५.२०१९ रोजी पीडिता ही कामावरून परत आली नाही म्हणून तिचा शोध घेतला परंतु ती न मिळून आल्याने व त्या संदर्भाने बांधकाम मिस्त्री कडून माहिती मिळाल्याने पिडीतेच्या आईने आरोपी हकीम मेहबूब काजी रा. रामनगर, सांजा रोड, उस्मानाबाद यांच्या विरुद्ध तिच्या अल्पवयीन मुलीस फूस लावून पळून नेले म्हणून तक्रार दिली होती. सदर तक्रारीवरून आरोपी विरुद्ध पो.स्टे. आनंदनगर उस्मानाबाद येथे गु.र.नं. 392G/2098 कलम ३६३ भा. द. वि. नुसार गुन्हा नोंद झाला. सदर गुन्ह्याचा तपास पीएसआय डी. व्ही. सिद्धे व पीएसआय एस. जी. भुजबळ यांनी पूर्ण करून आरोपी विरुद्ध मा. न्यायालयात दोषारोपपत्र दाखल केले.
सदर प्रकरणाची सुनावणी तत्कालीक विशेष न्यायाधीश एस. डी. जगताप व विशेष न्यायाधीश श्रीमती टी.जी. मिटकरी यांचे न्यायालयात पूर्ण झाली. सदर प्रकरणात आरोपी विरुद्ध दोषसिद्धीसाठी सरकार पक्षातर्फे एकूण ११ साक्षीदार तपासण्यात आले. सदर प्रकरणातील पीडितेची नैसर्गिक साक्ष, मुख्याध्यापकाची साक्ष तसेच वैद्यकीय अधिकारी यांची साक्ष महत्त्वपूर्ण ठरली. आरोपी हा विवाहीत असुन त्यास तीन मुले असतानाही अल्पवयीन पिडीतेवर वारंवार लैंगिक अत्याचार केले होते. सरकार पक्षातर्फे तपासण्यात आलेले साक्षीदार व अतिरिक्त शासकीय अभियोक्ता सचिन सूर्यवंशी यांनी केलेला युक्तीवाद ग्राह्य धरूनश्रीमती टी. जी. मिटकरी, विशेष न्यायाधीश, उस्मानाबाद यांनी आरोपी हकीम मेहबूब काझी, रा. रामनगर, सांजा रोड, उस्मानाबाद यास भा.द.वि. चे कलम ३६३ अन्वये ०३ वर्षे सक्तमजुरी व रू ३,०००/- रू द्रव्यदंड, कलम ३६६ अन्वये ०५ वर्षे सक्तमजुरी व रू ३,०००/- रू द्रव्यदंड, कलम ३७६ अन्वये १० वर्षे सक्तमजुरी व रू ५,०००/- रू द्रव्यदंड, तसेच बा. लें. अ.प्रतिबंधक कायदा कलम ४ व ६ अन्वये प्रत्येकी १० वर्षे सक्तमजुरी व रू 5,000/- रू द्रव्यदंड अशी शिक्षा दिनांक ३१.०१.२०२५ रोजी सुनावली. सर्व शिक्षा आरोपीने एकत्रीत भोगावयाची आहे.
सदर प्रकरणात कोर्ट पैरवी म्हणुन महिला पोलीस कॉन्स्टेबल ब.नं. १४०६ सी. बी. तर्फेवाड, पो.स्टे. आनंदनगर, धाराशिव यांनी काम पाहिले.
