तुळजापूर तालुक्यातील अणदूर गावात महादेव मंदिराची विटंबना झाल्याने निर्माण झालेला तणाव अद्याप कायम आहे. या घटनेच्या निषेधार्थ अणदूर येथे शनिवारी सकाळी ११ वाजता एक तास सोलापूर-उमरगा हमरस्त्यावर रास्ता रोको आंदोलन करण्यात येणार आहे.
श्रावण महिन्यात घडलेल्या या घटनेमुळे ग्रामस्थांमध्ये तीव्र संताप आहे. महादेव पिंड आणि नंदीची विटंबना केल्याने अणदूर आणि खुदावाडी गावात तणावपूर्ण वातावरण आहे. या प्रकरणी पोपट राम चव्हाण याला अटक करण्यात आली असली तरी, या घटनेमागे नेमका कोण आहे याचा छडा लावण्याची मागणी ग्रामस्थ करत आहेत.
या घटनेच्या निषेधार्थ गुरुवारी आणि शुक्रवारी अणदूर बंद पाळण्यात आला होता. आता शनिवारी सकाळी ११ वाजता रास्ता रोको आंदोलन करण्यात येणार असून, याबाबतचे निवेदन नळदुर्ग पोलिसांना देण्यात आले आहे.
पोलिसांनी या प्रकरणाचा गांभीर्याने तपास करून दोषींवर कठोर कारवाई करावी, अशी मागणी ग्रामस्थांकडून होत आहे.
