येरमाळा : तेरखेडा येथे दुकानावरून विद्युत तारा नेल्याच्या कारणावरून वाद झाल्याने तिघांनी मिळून एका व्यक्तीला मारहाण केल्याची घटना घडली आहे. याप्रकरणी येरमाळा पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, दि. 3 मार्च 2025 रोजी सकाळी 11.30 वाजताच्या सुमारास तेरखेडा येथे फिर्यादी रफिक हसन शेख (वय 54, रा. तेरखेडा, ता. वाशी) हे काळे यांच्या मोकळ्या प्लॉटजवळ होते. यावेळी आरोपी राजेंद्र विठ्ठल काळे, केदार काळे आणि समाधान काळे (सर्व रा. तेरखेडा, ता. वाशी) यांनी दुकानावरून विद्युत तारा का नेली याबाबत विचारणा केल्याने फिर्यादीला शिवीगाळ करत लाथाबुक्क्यांनी मारहाण केली. तसेच लाकडी दांडक्याने आणि लोखंडी रॉडने मारहाण करून त्यांना जखमी केले. आरोपींनी फिर्यादीला जिवे ठार मारण्याची धमकी दिली असल्याचे तक्रारीत नमूद आहे.
या घटनेबाबत रफिक शेख यांनी 3 मार्च 2025 रोजी तक्रार दाखल केली असून, येरमाळा पोलीस ठाण्यात भारतीय दंड संहितेच्या कलम 118(1), 115(2), 352, 351(2), 351(3), 3(5) अन्वये गुन्हा दाखल करण्यात आला आहे. पुढील तपास पोलीस करत आहेत.
