धारशिव – तालुक्यातील रुईभर येथील आकाश गोरोबा चव्हाण यांनी बेंबळी येथील तथाकथित डॉ. सुधीर झिंगाडे यांच्यावर चुकीच्या उपचारांबाबत तक्रार अर्ज दाखल केला आहे. या अर्जाच्या आधारे जिल्हा आरोग्य अधिकाऱ्यांनी चौकशीचे आदेश दिले आहेत.
तक्रार अर्जातील प्रमुख मुद्दे:
- चुकीचे निदान आणि उपचार: १ जून २०२५ रोजी पोटदुखीच्या त्रासामुळे आकाश चव्हाण हे डॉ. झिंगाडे यांच्याकडे गेले असता, त्यांना मुतखडा असल्याचे सांगण्यात आले. डॉक्टरांनी दिलेल्या औषधांमुळे आणि सलाईनमुळे चव्हाण यांची प्रकृती अधिकच बिघडली, त्यांना उलट्या आणि चक्कर येऊ लागली.
- प्रकृती गंभीर: प्रकृती खालावल्याने त्यांना बेशुद्ध अवस्थेत सिव्हिल हॉस्पिटलमध्ये दाखल करण्यात आले. तेथे सोनोग्राफी आणि एक्स-रे तपासणीत त्यांच्या स्वादुपिंडावर सूज असल्याचे निदान झाले.
- पुढील उपचार: त्यानंतर त्यांनी ३ जून ते ११ जून या कालावधीत डॉ. भारत माने यांच्या रुग्णालयात उपचार घेतले, जिथे सिटी स्कॅनमध्ये स्वादुपिंडात सूज आणि बाजूला पाणी साचल्याचे निदान झाले. योग्य उपचारानंतर ते बरे झाले.
- गंभीर आरोप: डॉ. झिंगाडे यांच्या अयोग्य उपचारामुळे जीवाला धोका निर्माण झाल्याचा आरोप आकाश चव्हाण यांनी केला आहे. तसेच, बेंबळी आणि परिसरातील इतर रुग्णांनाही अशा चुकीच्या उपचारांना सामोरे जावे लागत असल्याचा दावा त्यांनी केला आहे.
- कारवाईची मागणी: या प्रकरणी डॉ. झिंगाडे यांच्यावर योग्य ती कारवाई करण्याची मागणी आकाश चव्हाण यांनी केली आहे, अन्यथा उपोषणाचा इशारा दिला आहे.
जिल्हा आरोग्य अधिकाऱ्यांचे चौकशीचे आदेश:
आकाश चव्हाण यांच्या १३ जून २०२५ रोजीच्या तक्रार अर्जाची दखल घेत, जिल्हा आरोग्य अधिकारी, जिल्हा परिषद, धाराशिव यांनी या प्रकरणाच्या सखोल चौकशीचे आदेश दिले आहेत. तालुका आरोग्य अधिकाऱ्यांना सात दिवसांच्या आत चौकशी करून अहवाल सादर करण्याचे निर्देश देण्यात आले आहेत.
यापूर्वीही डॉ. झिंगाडे यांच्यावर गंभीर आरोप करण्यात आले होते. त्यांच्यावर एमबीबीएस पदवी नसतानाही लेटरपॅडवर तसे लिहून रुग्णांची फसवणूक केल्याचा आणि क्लिनिकमध्ये पुरेशा सोयीसुविधा नसतानाही उपचार करत असल्याचा आरोप आहे.
या त्रुटी पुढीलप्रमाणे:
- बॉम्बे नर्सिंग रजिस्ट्रेशन अॅक्ट नुसार डॉ. शिंगाडे यांची नोंदणी ३१ मार्च २०२१ रोजी संपली होती आणि त्यानंतर त्यांनी पुनर्नोंदणी केलेली नाही.
- त्यांची शैक्षणिक अर्हता DM&S असतानाही त्यांनी प्रिस्क्रिप्शन पॅडवर MMBS, DM&S अशी नोंद केली होती.
- बॉम्बे नर्सिंग रजिस्ट्रेशन अॅक्ट नुसार त्यांना दोन बेडची परवानगी होती, परंतु प्रत्यक्षात त्यांच्याकडे चार बेड आढळून आले.
- त्यांच्या दवाखान्यात बाथरूमची व्यवस्था नव्हती.
