भूम शहरात गुंडांचा थरार! तरुणावर कोयत्याने प्राणघातक हल्ला; पीव्हीसी पाईप कारखाना पेटवून लावले लाखोंचे नुकसान

भूम: भूम शहर आणि परिसरात दोन गुंडांनी मिळून एका २२ वर्षीय तरुणाचा जिवंत मारण्याच्या उद्देशाने वेगवेगळ्या ठिकाणी पाठलाग करत कोयत्याने बेदम मारहाण केल्याची धक्कादायक घटना समोर आली आहे. नराधम आरोपींनी एवढ्यावरच न थांबता रात्रीच्या सुमारास एका पाईप कारखान्यात ज्वलनशील पदार्थ टाकून मशीनला आग लावत सार्वजनिक व खाजगी मालमत्तेचे मोठे नुकसान केले. या भयंकर प्रकारामुळे भूम शहरात खळबळ उडाली असून भूम पोलीस ठाण्यात दोन्ही आरोपींविरुद्ध खुनाचा प्रयत्न आणि जाळपोळीचा गंभीर गुन्हा दाखल करण्यात आला आहे.

श्रीराम ऊर्फ गोलू दशरथ साठे आणि अमीर अनवर शेख (दोघे रा. आरसोली, ता. भूम, जि. धाराशिव) अशी गुन्हा दाखल झालेल्या संशयित आरोपींची नावे आहेत. या प्राणघातक हल्ल्यात महादेव चंद्रकांत मुंडेकर (वय २२, रा. आरसोली, भूम) हा तरुण गंभीर जखमी झाला असून, त्याने दिलेल्या तक्रारीवरून हा गुन्हा नोंदवण्यात आला आहे.

पेट्रोल पंपापासून विश्रामगृहापर्यंत थरार

पोलिसांनी दिलेल्या माहितीनुसार, फिर्यादी महादेव मुंडेकर आणि आरोपींमध्ये पूर्ववैमनस्य होते. मंगळवार, दि. २ जून रोजी रात्री साडेनऊ ते दहा वाजेच्या सुमारास आरोपींनी महादेवला भूम-परंडा रोडलगत असलेल्या ‘प्रतीक पेट्रोल पंपावर’ गाठले. तिथे त्याला अश्लील शिवीगाळ करत लाथाबुक्क्यांनी आणि धारदार कोयत्याने मारहाण करण्यास सुरुवात केली.

जीवाच्या आकांशाने महादेव तिथून पळाला असता, आरोपींनी रात्री पाऊण ते दोन वाजेच्या दरम्यान शहरातील वेगवेगळ्या भागात त्याचा थरारक पाठलाग केला. आरोपींनी त्याला ‘आयटीआय कॉलेजसमोरील हॉटेल अभिषेक’ समोर आणि ‘शासकीय विश्रामगृहाच्या’ (Government Rest House) समोर गाठून पुन्हा कोयत्याने वार करत गंभीर जखमी केले.

पाईप कारखाना पेटवला!

महादेवचा पाठलाग करत असतानाच मध्यरात्री आरोपींनी पार्डी रोडलगत असलेल्या सूरज शिंदे यांच्या पीव्हीसी (PVC) पाईपच्या कारखान्यामध्ये प्रवेश केला. तिथे त्यांनी थेट कारखान्यातील मशीनवर ज्वलनशील पदार्थ (पेट्रोल किंवा केमिकल) टाकून आग लावून दिली. या जाळपोळीत कारखान्यातील यंत्रसामग्री जळून खाक झाली असून मोठे नुकसान झाले आहे.

खुनाचा प्रयत्न आणि जाळपोळीचा गुन्हा नोंद

जखमी महादेव मुंडेकर याने बुधवार, दि. ३ जून रोजी भूम पोलीस ठाण्यात हजर राहून आपबिती सांगितली. त्यानुसार पोलिसांनी आरोपी श्रीराम ऊर्फ गोलू साठे आणि अमीर शेख यांच्याविरुद्ध भारतीय न्याय संहिता (BNS) कलम १०९(२) (खुनाचा प्रयत्न), ११८(२) (घातक शस्त्राने गंभीर दुखापत करणे), ३५२, ३२६(f), ३२४, ३(५) सह ‘सार्वजनिक संपत्तीस हानी प्रतिबंधक अधिनियम’ कलम ३ आणि ४ अन्वये गुन्हा दाखल केला आहे.

पोलीस घेत आहेत शोध:

शहरात दहशत माजवून जाळपोळ आणि जीवघेणा हल्ला करणाऱ्या दोन्ही आरोपींचा शोध घेण्यासाठी भूम पोलिसांनी तात्काळ चक्रे फिरवली आहेत. या प्रकरणाचा पुढील तपास पोलीस उपनिरीक्षक दर्जाचे अधिकारी करत असून, आरोपींना लवकरच बेड्या ठोकल्या जातील असे पोलिसांनी सांगितले.