भूम – तालुक्यातील चिंचपूर ढगे येथे शेत नांगरण्याच्या किरकोळ कारणावरून एका दाम्पत्याला गावातीलच दोघा जणांनी शिवीगाळ करत मारहाण केल्याची घटना घडली आहे. या मारहाणीत कुर्‍हाडीच्या दांड्याचा वापर करण्यात आला असून जीवे मारण्याची धमकीही देण्यात आली. पीडित महिलेच्या तक्रारीवरून भूम पोलिसांनी दोन आरोपींविरुद्ध गुन्हा दाखल केला आहे.
मिळालेल्या माहितीनुसार, फिर्यादी रंजना विठ्ठल सांगळे (वय ४० वर्षे, रा. चिंचपूर ढगे) यांनी दिलेल्या फिर्यादीत म्हटले आहे की, दिनांक ४ एप्रिल २०२५ रोजी सकाळी साडेआठ वाजण्याच्या सुमारास त्या बेलगाव शिवारातील शेतगट क्रमांक १३२ मध्ये होत्या. यावेळी आरोपी शहाजी बापू सांगळे आणि तारामती शहाजी सांगळे (दोघे रा. चिंचपूर ढगे) यांनी शेत नांगरण्याच्या कारणावरून रंजना सांगळे यांच्याशी वाद घातला.
या वादाचे रूपांतरण मारहाणीत झाले. आरोपींनी रंजना यांना शिवीगाळ करत लाथाबुक्क्यांनी आणि कुर्‍हाडीच्या दांड्याने मारहाण करून जखमी केले. तसेच, आरोपींनी रंजना यांचे पती विठ्ठल सांगळे यांनाही शिवीगाळ करत लाथाबुक्क्यांनी मारहाण केली आणि जीवे ठार मारण्याची धमकी दिली.
या घटनेनंतर रंजना सांगळे यांनी ६ एप्रिल २०२५ रोजी भूम पोलीस ठाण्यात धाव घेऊन तक्रार दाखल केली. त्यांच्या तक्रारीवरून पोलिसांनी आरोपी शहाजी सांगळे आणि तारामती सांगळे यांच्याविरुद्ध भारतीय न्याय संहिता कलम ११८(१) (स्वेच्छेने दुखापत करणे), ११५(२) (गुन्हा करण्यास मदत करणे), ३५२ (धमकी देणे), ३५१(२) (गुन्हेगारीसाठी जमाव जमवणे) आणि ३(५) (अत्याचार प्रतिबंधक कायद्यातील तरतूद) अन्वये गुन्हा नोंदवला आहे. भूम पोलीस या प्रकरणाचा पुढील तपास करत आहेत.
