धाराशिव: तुळजापूर पोलीस ठाण्याच्या आवारातच ५ हजार रुपयांची लाच घेताना रंगेहाथ पकडण्यात आलेला सहाय्यक पोलीस उपनिरीक्षक (ASI) श्रीनिवास आरदवाड याच्या कारवाईनंतर आता एका नव्या आणि खळबळजनक वादाला तोंड फुटले आहे. या संपूर्ण लाच प्रकरणात तुळजापूरचे प्रभारी पोलीस निरीक्षक अण्णासाहेब मांजरे यांची भूमिका काय आहे, याची सखोल चौकशी होण्याची मागणी आता जोर धरू लागली आहे. या दोघांचे जुने ‘साटेलोटे’ असल्याची जोरदार चर्चा सध्या पोलीस वर्तुळात रंगली आहे.
आनंदनगर पोलीस ठाण्यातील जुने कनेक्शन:
एकाच पोलीस ठाण्यात लाचखोरीचा एवढा मोठा प्रकार उघडकीस आल्याने संशयाची सुई थेट प्रभारी अधिकाऱ्यांकडे वळली आहे. यामागील मुख्य कारण म्हणजे, लाचखोर एएसआय श्रीनिवास आरदवाड आणि प्रभारी पोलीस निरीक्षक अण्णासाहेब मांजरे हे दोघेही यापूर्वी धाराशिव शहरातील ‘आनंदनगर पोलीस स्टेशन’मध्ये एकत्र कार्यरत होते. तेथूनच या दोघांचे घट्ट ‘साटेलोटे’ असल्याची माहिती सूत्रांनी दिली आहे.
कामतकरांना हटवून आरदवाडांना ‘क्रीम पोस्टिंग’:
मांजरे यांचे आरदवाड यांच्यावर ‘विशेष प्रेम’ आणि मेहेरनजर असल्याचे नुकत्याच घडलेल्या एका घटनेवरून स्पष्ट होते. अवघ्या काही दिवसांपूर्वीच पोलीस ठाण्यातील एका अत्यंत महत्त्वाच्या आणि ‘क्रीम पोस्टिंग’ मानल्या जाणाऱ्या जागेवरून कामतकर यांची तडकाफडकी उचलबांगडी करण्यात आली. त्यांच्या जागी मांजरे यांनी आपला मर्जीतील अधिकारी म्हणून एएसआय श्रीनिवास आरदवाड यांची वर्णी लावली होती. या ‘क्रीम पोस्टिंग’मागे नेमके काय साटेलोटे होते, हे या लाच प्रकरणावरून आता उघड होताना दिसत आहे.
मांजरे यांच्या भूमिकेची चौकशी होणार का?
आरदवाड याने गुन्ह्यात मदत करण्यासाठी आणि कलमवाढ न करण्यासाठी मागितलेली लाचेची रक्कम खरोखरच फक्त त्याच्याच खिशात जाणार होती, की यात वरपर्यंत ‘हिस्सा’ ठरलेला होता? आनंदनगरपासूनची मैत्री आणि तुळजापूरमधील ‘क्रीम पोस्टिंग’ची बक्षीसी पाहता, एसीबीने आता या प्रकरणात प्रभारी पोलीस निरीक्षक अण्णासाहेब मांजरे यांचा नेमका ‘रोल’ काय होता, याचाही तपास करण्याची अत्यंत गरज आहे.
वरिष्ठ अधिकाऱ्यांनी यापूर्वीच स्पष्ट केले आहे की, एखाद्या पोलीस ठाण्यात लाचेचे प्रकरण घडल्यास प्रभारी अधिकाऱ्यावर कारवाई केली जाईल. आता एवढे भक्कम कनेक्शन समोर आल्यावर पोलीस अधीक्षक रितू खोखर या प्रभारी निरीक्षक मांजरे यांच्यावर काय कारवाई करणार, याकडे संपूर्ण जिल्ह्याचे लक्ष लागून आहे.
