वाशी (धाराशिव) : ऊसतोडणीच्या कामाचे पैसे देण्यास नकार दिल्याच्या कारणावरून झालेल्या वादातून एका ४५ वर्षीय व्यक्तीवर कोयता, लोखंडी रॉड आणि लाकडी काठीने प्राणघातक हल्ला करून गंभीर जखमी केल्याची घटना उघडकीस आली आहे. याप्रकरणी वाशी पोलीस ठाण्यात भूम तालुक्यातील आंद्रुड येथील तिघांविरुद्ध गुन्हा दाखल करण्यात आला आहे.
मिळालेल्या माहितीनुसार, आंद्रुड (ता. भूम, जि. धाराशिव) येथील रहिवासी सिद्धेश्वर सदाशिव लिमकर (वय ४५ वर्षे) यांच्याशी ८ नोव्हेंबर रोजी रात्री ८:०० वाजेच्या सुमारास ईट येथील हॉटेल यशराज समोर तसेच आंद्रुड येथे हा प्रकार घडला. ऊसतोडणीच्या कामाचे पैसे देण्यास नकार दिल्याच्या कारणावरून संशयित आरोपी ज्ञानेश्वर गोकुळ लिमकर, गोकुळ गोरख लिमकर आणि अशोक केशव चव्हाण (सर्व रा. आंद्रुड, ता. भूम) यांनी सिद्धेश्वर लिमकर यांना अर्वाच्य भाषेत शिवीगाळ करण्यास सुरुवात केली.
वाद विकोपाला गेल्यानंतर तिन्ही आरोपींनी संगनमत करून सिद्धेश्वर लिमकर यांना लाथाबुक्क्यांसह कोयता, लोखंडी रॉड आणि लाकडी काठीने बेदम मारहाण केली. या हल्ल्यात लिमकर गंभीर जखमी झाले असून, आरोपींनी त्यांना जीवे ठार मारण्याची धमकीही दिली.
उपचारानंतर सिद्धेश्वर लिमकर यांनी १२ नोव्हेंबर रोजी वाशी पोलीस ठाण्यात धाव घेऊन फिर्याद दिली. त्यांच्या तक्रारीवरून वाशी पोलिसांनी तिन्ही आरोपींविरुद्ध भारतीय न्याय संहिता (BNS) कलम ११८(२), ११८(१) (धोकादायक शस्त्राने दुखापत करणे), ११५(२), ३५२ (शांतता भंग करण्याच्या उद्देशाने अपमान), ३५१(२)(३) (गुन्हेगारी धमकी) आणि ३(५) (समान उद्देशाने एकत्रित गुन्हा करणे) अन्वये गुन्हा नोंदवला आहे. या प्रकरणाचा पुढील तपास वाशी पोलीस करत आहेत.
