भूम: शेतातील विद्युत मोटारीची वायर कोणी तोडली? असे विचारल्याचा राग मनात धरून एका ५९ वर्षीय शेतकऱ्याला सहा जणांच्या जमावाने अमानुष मारहाण केल्याची घटना भूम तालुक्यातील दुधोडी येथे घडली आहे. मारहाणीत कुऱ्हाडीच्या तुंब्याचा (दांड्याचा) वापर करण्यात आला असून, याप्रकरणी भूम पोलीस ठाण्यात सहा जणांविरुद्ध दंगलीचा गुन्हा दाखल करण्यात आला आहे.
अरुण नरहरी बहीर (वय ५९, रा. दुधोडी, ता. भूम) असे मारहाणीत जखमी झालेल्या फिर्यादीचे नाव आहे.
पोलिसांनी दिलेल्या माहितीनुसार, ही घटना २४ नोव्हेंबर २०२५ रोजी सकाळी ९:३० वाजताच्या सुमारास दुधोडी गावातील देवी मंदिराजवळ घडली. फिर्यादी अरुण बहीर यांनी त्यांच्या शेतातील मोटारीची वायर तुटलेली पाहिली होती. याबद्दल त्यांनी विचारणा केली असता, याचा राग आरोपींना आला.
आरोपी रामचंद्र संपतराव महानवर, विजय रामचंद्र महानवर, दत्तात्रय देवराव महानवर, सार्थक दत्तात्रय महानवर, गणपत महादेव महानवर आणि अजित लक्ष्मण महानवर (सर्व रा. दुधोडी) यांनी गैरकायद्याची मंडळी जमवून अरुण बहीर यांना गाठले. त्यांना शिवीगाळ करत लाथाबुक्क्यांनी मारहाण केली. तसेच आरोपींनी कुऱ्हाडीच्या तुंब्याने मारून त्यांना जखमी केले आणि जिवे मारण्याची धमकी दिली.
या घटनेनंतर अरुण बहीर यांनी २७ नोव्हेंबर रोजी भूम पोलीस ठाण्यात फिर्याद दिली. त्यावरून वरील सहाही आरोपींविरुद्ध भारतीय न्याय संहिता (BNS) कलम ११८ (१), ११५ (२), ३५२, १८९ (२), १९१ (२), १९१ (३), १९० आणि ३५१ (३) अन्वये गुन्हा दाखल करण्यात आला आहे. पुढील तपास भूम पोलीस करत आहेत.
