उमरगा: उमरगा येथील एका नामांकित सीबीएसई (CBSC) स्कूलमध्ये एका मुलाची खरी आई नसतानाही, “मीच त्याची आई आहे” असे खोटे सांगून फसवणुकीच्या उद्देशाने शालेय मूळ कागदपत्रे लंपास केल्याचा धक्कादायक प्रकार समोर आला आहे. फिर्यादीच्या विभक्त राहणाऱ्या पत्नीने आणि तिच्या नातेवाईकांनी मालमत्ता व पैशांसाठी रचलेल्या कटाचा हा भाग असल्याचे उघडकीस आले आहे. याप्रकरणी उमरगा न्यायालयाच्या आदेशानंतर (कलम १५६(३)) एका २५ वर्षीय महिलेसह इतरांवर फसवणूक, बनावटगिरी आणि खंडणी गोळा केल्याप्रकरणी गंभीर गुन्हे दाखल करण्यात आले आहेत.
शाळेत जाऊन खोटे सांगत साधला डाव
पोलिसांकडून मिळालेल्या प्राथमिक माहितीनुसार, फिर्यादी हिराजी तुळशिराम गायकवाड (वय ५२ वर्षे, रा. दापका, ता. उमरगा) यांचा मुलगा उमरगा येथील ‘डॉ. के. डी. शेंडगे सीबीएसई स्कूल’मध्ये शिक्षण घेतो. हिराजी गायकवाड व त्यांची पत्नी सध्या विभक्त राहतात.
४ मार्च २०२३ रोजी सकाळी ८:०० ते सायंकाळी ५:०० वाजण्याच्या सुमारास, आरोपी महिला श्रद्धा उर्फ गौरी धैर्यशील पाटील (जगताप) (वय २५ वर्षे, रा. भांतागळी, ता. लोहारा, जि. धाराशिव) ही या शाळेत गेली. हिराजी यांच्या विभक्त राहणाऱ्या पत्नीने आणि तिच्या नातेवाईकांनी पैशांची व मालमत्तेची मागणी पूर्ण करण्यासाठी आणि फिर्यादीला धाक दाखवण्यासाठी एक कट रचला होता. त्यानुसार श्रद्धा हिने त्या मुलाची खरी आई नसतानाही, शाळेत जाऊन “मीच या मुलाची आई आहे,” असे खोटे भासवले. तिने शाळेची दिशाभूल करून मुलाची अत्यंत महत्त्वाची व मूल्यवान मूळ शालेय कागदपत्रे ताब्यात घेतली आणि ती घेऊन पसार झाली.
मालमत्ता उकळण्यासाठी रचला कट; न्यायालयाच्या आदेशाने गुन्हा
आपल्या मुलाची शालेय कागदपत्रे फसवणूक करून आणि खोटे सांगून लांबवल्याचे हिराजी गायकवाड यांच्या लक्षात आले. यामागे पत्नी आणि नातेवाईकांचा मालमत्ता उकळण्याचा व फसवणुकीचा कट असल्याचे स्पष्ट झाल्यानंतर त्यांनी कायदेशीर लढाई लढली. त्यांनी याप्रकरणी उमरगा येथील प्रथम वर्ग न्यायदंडाधिकारी (कोर्ट क्र. १) यांच्या न्यायालयात दाद मागितली होती.
माहिती आणि पुराव्यांची दखल घेत मानावंत न्यायालयाने फौजदारी प्रक्रिया संहितेच्या (CrPC) कलम १५६(३) अन्वये पोलिसांना गुन्हा दाखल करण्याचे आदेश दिले. त्यानुसार ४ जुलै २०२६ रोजी उमरगा पोलीस ठाण्यात रीतसर प्रथम खबरी अहवाल (FIR) नोंदवण्यात आला.
या कलमांन्वये गुन्हा दाखल
पोलिसांनी आरोपी श्रद्धा उर्फ गौरी धैर्यशील पाटील (जगताप) हिच्यासह फिर्यादीच्या पत्नी व संबंधित नातेवाईकांवर भारतीय दंड विधान (IPC) कलम ४१९ (तोतयागिरी करून फसवणूक), ४२० (फसवणूक), ३८३ (खंडणी/धाक दाखवणे), ४६३, ४६४, ४६८ (बनावट दस्तऐवज तयार करणे), ३४ (समान उद्देश) आणि १२०(बी) (गुन्हेगारी कट रचणे) अन्वये गुन्हा दाखल केला आहे. न्यायालयीन आदेशानंतर दाखल झालेल्या या गुंतागुंतीच्या प्रकरणाचा पुढील तपास उमरगा पोलीस करत आहेत.
