धाराशिव: भारत फायनान्स कंपनीत ‘फिल्ड असिस्टंट’ म्हणून काम करत असताना महिला ग्राहकांकडून वसूल केलेली रक्कम कंपनीत जमा न करता स्वतःच्या फायद्यासाठी वापरल्याचा धक्कादायक प्रकार उघडकीस आला आहे. या प्रकरणी धाराशिव येथील आनंदनगर पोलीस ठाण्यात तीन कर्मचाऱ्यांवर फसवणुकीचा गुन्हा दाखल करण्यात आला आहे. यात कंपनीची एकूण १ लाख ७५ हजार ८२६ रुपयांची फसवणूक झाली आहे.
मिळालेल्या माहितीनुसार, २७ मार्च २०२४ ते २४ ऑक्टोबर २०२४ या सात महिन्यांच्या कालावधीत हा अपहार झाला. आरोपी हे भारत फायनान्सच्या धाराशिव शाखेत फिल्ड असिस्टंट म्हणून कार्यरत होते. या काळात त्यांनी १५ महिला ग्राहकांकडून त्यांच्या कर्जाची ‘प्री-पेमेंट’ (Prepayment) म्हणून एकूण १,७५,८२६ रुपये वसूल केले. नियमानुसार ही रक्कम कंपनीच्या शाखेत जमा करणे आवश्यक होते. मात्र, आरोपींनी स्वतःचा आर्थिक फायदा व्हावा या हेतूने ही रक्कम कंपनीत न भरता स्वतःकडेच ठेवली व ती वापरून कंपनीची आर्थिक फसवणूक केली.
या प्रकरणी साईनाथ देवराव बेळकोने यांनी २० फेब्रुवारी २०२६ रोजी पोलिसांत धाव घेत तक्रार दिली. त्यांच्या फिर्यादीवरून आनंदनगर पोलीस ठाण्यात खालील तीन आरोपींवर गुन्हा दाखल करण्यात आला आहे:
१. राजेश भारत जगताप (रा. पिंपळगाव डोळा, ता. कळंब, जि. धाराशिव)
२. ज्योतीबा संतोष पवार (रा. जवळा, ता. कळंब, जि. धाराशिव)
३. सुरज बालाजी भांगे (रा. दाउतपुर, ता. जि. धाराशिव)
आनंदनगर पोलिसांनी या प्रकरणी भारतीय न्याय संहिता (BNS) कलम ३१८(४), ३१६(५) आणि ३(५) अन्वये गुन्हा नोंदवला असून, पोलीस या प्रकरणाचा पुढील तपास करत आहेत.
