धाराशिव: जमिनीचा वाद सुरू असताना बिशीच्या व्यवहारात तारण म्हणून घेतलेल्या चेकचा गैरवापर करून फसवणूक केल्याप्रकरणी दोघा भावांवर ढोकी पोलीस ठाण्यात गुन्हा दाखल करण्यात आला आहे. प्रशांत वसंत वराळे आणि प्रवीण वसंत वराळे (दोघे रा. मुळेवाडी, ता. जि. धाराशिव) अशी आरोपींची नावे आहेत.
याप्रकरणी उत्रेश्वर प्रभू वराळे (वय ४१, रा. मुळेवाडी) यांनी फिर्याद दिली आहे. पोलिसांनी दिलेल्या माहितीनुसार, फिर्यादी उत्रेश्वर वराळे आणि आरोपी प्रशांत व प्रवीण वराळे यांच्यात जमिनीचा वाद न्यायालयात प्रलंबित आहे. दरम्यान, २०१४ ते २०१६ या कालावधीत त्यांनी मुळेवाडी येथे खाजगीरीत्या दरमहा एक हजार रुपयांप्रमाणे ५० सदस्यांची बिशी चालवली होती.
या बिशीच्या व्यवहारापोटी आरोपींनी संगनमत करून फिर्यादी उत्रेश्वर यांच्याकडून तारण म्हणून एक कोरा चेक घेतला होता. जमिनीचा वाद सुरू असल्याचा फायदा घेत आरोपींनी या चेकवर स्वतःच्या सोयीनुसार नाव, रक्कम आणि तारीख टाकून धनादेशाचा गैरवापर केला. या माध्यमातून स्वतःला आर्थिक फायदा मिळवून फिर्यादीची फसवणूक केली.
हे प्रकरण प्रथम वर्ग न्यायदंडाधिकारी न्यायालय, धाराशिव यांच्याकडे गेल्यानंतर न्यायालयाच्या आदेशानुसार, दिनांक १६ जून २०२५ रोजी ढोकी पोलीस ठाण्यात प्रशांत वराळे आणि प्रवीण वराळे या दोघांविरुद्ध भारतीय दंड विधान संहितेच्या कलम ४२० (फसवणूक), ४६७ (किंमती रोख्याची बनावट), ४६८ (फसवणुकीसाठी बनावटगिरी), ४७१ (बनावट दस्तऐवज खरा म्हणून वापरणे) आणि ३४ (समान उद्देश) अन्वये गुन्हा नोंदवण्यात आला आहे. पुढील तपास पोलीस करत आहेत.
