ढोकी आणि नळदुर्गमध्ये आढळले दोन अर्धवट जळालेले मृतदेह; दोन्ही खुनांचे ‘कनेक्शन’ आहे का?

धाराशिव: जिल्ह्यात एकाच दिवशी दोन वेगवेगळ्या पोलीस ठाण्याच्या हद्दीत क्रूर पद्धतीने खून करून पुरावा नष्ट करण्यासाठी मृतदेह जाळल्याच्या घटना समोर आल्याने खळबळ उडाली आहे. ढोकी आणि नळदुर्ग येथे आढळलेल्या या मृतदेहांची ओळख पटवणे हे पोलिसांसमोर मोठे आव्हान असून, दोन्ही गुन्ह्यांची पद्धत (Modus Operandi) सारखीच असल्याने या दोन खुनांचा परस्पर संबंध आहे का? या दिशेने पोलीस तपास करत आहेत.

ढोकी: तरुणीचा निर्घृण खून

पहिल्या घटनेत, ढोकी पोलीस ठाण्याच्या हद्दीत एका तरुणीचा मृतदेह आढळला आहे. २७ नोव्हेंबर रोजी सकाळी ६ वाजण्यापूर्वी ढोकी शिवारातील अंकुश बोडके यांच्या शेतालगत, रेल्वे पटरीपासून ३०० मीटर अंतरावर हा प्रकार उघडकीस आला. मृत तरुणीचे वय अंदाजे १८ ते २३ वर्षे आहे. अज्ञात आरोपीने तिच्या डोक्यात धारदार शस्त्राने वार करून तिचा खून केला आणि त्यानंतर ओळख पटू नये म्हणून मृतदेह अर्धवट जाळण्याचा प्रयत्न केला. याप्रकरणी पोलीस पाटील राहुल माणिक वाकुरे यांनी दिलेल्या फिर्यादीवरून ढोकी पोलीस ठाण्यात भारतीय न्याय संहिता (BNS) कलम १०३(१) आणि २३८ अन्वये गुन्हा दाखल करण्यात आला आहे.

नळदुर्ग: पुरुषाचा संशयास्पद मृत्यू

दुसरी घटना नळदुर्ग पोलीस ठाण्याच्या हद्दीत घडली आहे. फुलवाडी शिवारातील पोगल सुतगिरणीच्या इमारतीजवळ असलेल्या शंकरराव बोरकर यांच्या पडीक शेतात एका ३५ ते ४० वर्षीय अज्ञात पुरुषाचा मृतदेह आढळून आला. ही घटना १९ नोव्हेंबर रोजी घडली होती, मात्र याप्रकरणी २७ नोव्हेंबर रोजी गुन्हा दाखल करण्यात आला आहे. येथेही अज्ञात आरोपीने मृताच्या डोक्यात कशाने तरी मारून हत्या केली आणि पुरावा नष्ट करण्यासाठी मृतदेह जाळला. याप्रकरणी पोलीस अंमलदार दिलीप मेघराज राठोड यांच्या फिर्यादीवरून नळदुर्ग पोलीस ठाण्यात गुन्हा दाखल करण्यात आला आहे.

पोलिसांसमोर तपासाचे आव्हान

या दोन्ही घटनांमध्ये आरोपींनी वापरलेली पद्धत अत्यंत समान आहे. दोन्ही ठिकाणी बळींच्या डोक्यात वार करण्यात आले आहेत आणि पुरावा नष्ट करण्यासाठी मृतदेह जाळण्यात आले आहेत. त्यामुळे हे दोन्ही खून एकाच टोळीने किंवा व्यक्तीने केले आहेत का, किंवा हे ‘ऑनर किलिंग’चे प्रकरण आहे का, याचा पोलीस कसून तपास करत आहेत.

सद्यस्थितीत दोन्ही मृतदेहांची ओळख पटलेली नाही. नागरिकांना या वर्णनाच्या बेपत्ता व्यक्तींबद्दल काही माहिती असल्यास तात्काळ ढोकी किंवा नळदुर्ग पोलिसांशी संपर्क साधावा, असे आवाहन पोलीस प्रशासनाकडून करण्यात आले आहे.