धाराशिव: नवीन पेट्रोल पंप मंजूर करून देण्याचे आमिष दाखवून सायबर गुन्हेगारांनी भूम तालुक्यातील तांबेवाडी येथील एका ५५ वर्षीय व्यक्तीची तब्बल ३७ लाख ९९ हजार ५०० रुपयांची फसवणूक केल्याचा धक्कादायक प्रकार समोर आला आहे. याप्रकरणी धाराशिव सायबर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, आकाश नानासाहेब शिंदे (वय ५५, रा. तांबेवाडी, ता. भूम) असे फसवणूक झालेल्या व्यक्तीचे नाव आहे. यातील अज्ञात आरोपीने ७३६२९४९३२९ या मोबाईल क्रमांकावरून शिंदे यांच्याशी संपर्क साधला. आरोपीने शिंदे यांना नवीन पेट्रोल पंप मिळवून देण्याचे आमिष दाखवले.
या प्रलोभनाला बळी पडून शिंदे यांनी १५ सप्टेंबर २०२५ ते १५ नोव्हेंबर २०२५ या कालावधीत आरोपीने दिलेल्या दोन वेगवेगळ्या बँक खात्यांवर (खाते क्र. ०७०९०१००००३४५५५ आणि ८४९६१०१११११३४६७) वेळोवेळी पैसे पाठवले. शिंदे यांनी तांबेवाडी येथून फोनपे (PhonePe) द्वारे आणि भूम येथून आरटीजीएस (RTGS) द्वारे एकूण ३७ लाख ९९ हजार ५०० रुपये आरोपीला पाठवले.
मात्र, पैसे देऊनही पेट्रोल पंपाचे काम झाले नाही आणि पैसेही परत मिळाले नाहीत, तेव्हा आपली फसवणूक झाल्याचे शिंदे यांच्या लक्षात आले. यानंतर त्यांनी सायबर पोलिसांत धाव घेतली. आकाश शिंदे यांनी २७ नोव्हेंबर रोजी दिलेल्या फिर्यादीवरून सायबर पोलीस ठाण्यात भारतीय न्याय संहिता कलम ३१८ (४) तसेच माहिती तंत्रज्ञान कायदा (IT Act) कलम ६६ (सी) आणि ६६ (डी) अन्वये गुन्हा दाखल करण्यात आला आहे. पुढील तपास पोलीस करत आहेत.
