धाराशिव : स्थानिक गुन्हे शाखेने एका मोठ्या कारवाईत सोन्याचे दागिने आणि चार मोटरसायकली चोरणाऱ्या दोन आरोपींना ताब्यात घेतले आहे. ही कारवाई तुळजापूर येथील अपसिंगा रोडवर गुप्त माहितीच्या आधारे करण्यात आली. आरोपींकडून एकूण १,७५,००० रुपये किमतीचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, स्थानिक गुन्हे शाखेचे पथक धाराशिव जिल्ह्यात पेट्रोलिंग करत असताना, काही इसम चोरीचे दागिने आणि मोटरसायकल विकण्यासाठी तुळजापूरच्या अपसिंगा रोडवर येणार असल्याची माहिती गुप्त बातमीदारामार्फत मिळाली. या माहितीच्या आधारे पथकाने सापळा रचून धोंडीराम महादेव शिंगाडे (वय ४२, रा. शिरताव, ता. मान, जि. सातारा) आणि अनिल हरिश्चंद्र माने (वय ३३, रा. वासुदेव गल्ली, तुळजापूर) यांना ताब्यात घेतले.
सुरुवातीला त्यांनी उडवाउडवीची उत्तरे दिली, मात्र अधिक चौकशी केली असता त्यांनी गुन्ह्याची कबुली दिली. त्यांनी सांगितले की, सोन्याचे दागिने तुळजापूरमधून आणि मोटरसायकली धाराशिव जिल्हा, सोलापूर ग्रामीणमधील मोहोळ आणि सातारा जिल्ह्यातील म्हसवड येथून चोरल्या होत्या.
जप्त करण्यात आलेल्या मुद्देमालात चार मोटरसायकली आणि साडेपाच ग्रॅम वजनाचे सोन्याचे दागिने आहेत, ज्यांची एकूण किंमत १,७५,००० रुपये आहे. या चोरीच्या घटनांसंबंधी धाराशिव शहर, ढोकी, तुळजापूर, मोहोळ (जि. सोलापूर) आणि म्हसवड (जि. सातारा) या पोलीस ठाण्यांमध्ये गुन्हे दाखल आहेत. आरोपी आणि जप्त केलेला मुद्देमाल पुढील कारवाईसाठी तुळजापूर पोलिसांच्या ताब्यात देण्यात आले आहे.
ही यशस्वी कामगिरी पोलीस अधीक्षक श्रीमती रितू खोखर आणि अपर पोलीस अधीक्षक श्रीमती शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सहायक पोलीस निरीक्षक सचिन खटके, अमोल मोरे आणि त्यांच्या पथकाने केली आहे.
