धाराशिव: करजखेडा (ता. जि. धाराशिव) ग्रामपंचायतीला १५ व्या वित्त आयोगातून मिळालेल्या निधीत तब्बल ४ लाख २० हजार रुपयांचा गैरव्यवहार झाल्याचा प्रकार उघडकीस आला आहे. याप्रकरणी पंचायत समितीच्या विस्तार अधिकाऱ्यांनी दिलेल्या फिर्यादीवरून बेंबळी पोलीस ठाण्यात दोघांवर शासनाची फसवणूक केल्याप्रकरणी गुन्हा दाखल करण्यात आला आहे.
सुभाष महादेव कळसुले (रा. करजखेडा, ता. जि. धाराशिव) आणि एम. आर. सावंत (रा. टाकळी बेंबळी, ता. जि. धाराशिव) अशी गुन्हा दाखल झालेल्या आरोपींची नावे आहेत.
पोलिसांकडून मिळालेल्या माहितीनुसार, आरोपींनी १ जून २०२२ ते १६ नोव्हेंबर २०२२ या कालावधीत करजखेडा ग्रामपंचायतीमध्ये १५ व्या वित्त आयोगातून मिळालेल्या शासकीय निधीचा गैरवापर केला. संगनमत करून त्यांनी एकूण ४ लाख २० हजार रुपयांचा अपहार केला आणि शासनाची मोठी फसवणूक केली. या आर्थिक अनियमिततेची बाब समोर आल्यानंतर प्रकरणाची चौकशी करण्यात आली.
या प्रकरणी धाराशिव पंचायत समितीचे विस्तार अधिकारी संजय संतराव ढाकणे (वय ५५ वर्षे, रा. दैत्यकृपा कॉलनी, शाहूनगर, धाराशिव) यांनी २५ फेब्रुवारी २०२६ रोजी बेंबळी पोलीस ठाण्यात अधिकृत तक्रार दिली. या प्रथम खबरीवरून पोलिसांनी आरोपी सुभाष कळसुले आणि एम. आर. सावंत यांच्या विरुद्ध भारतीय दंड विधान संहिता (भा.दं.वि.) कलम ४०९ (लोकसेवकाकडून फौजदारी पात्र न्यासभंग), ४२० (फसवणूक) आणि ३४ (समान उद्देशाने केलेली कृती) अन्वये गुन्हा दाखल केला आहे. बेंबळी पोलीस या प्रकरणाचा पुढील तपास करत आहेत.
