धाराशिव – शहरात उधारीवर सुपारी देण्यास नकार दिल्याच्या कारणावरून एका ३० वर्षीय तरुणाला शिवीगाळ करत लोखंडी नट-बोल्ट असलेल्या वायरने मारहाण करून जखमी केल्याची घटना घडली आहे. आरोपीने पीडित तरुणाला जीवे मारण्याची धमकीही दिली. ही घटना शुक्रवार, ४ एप्रिल २०२५ रोजी रात्री आठच्या सुमारास महाराष्ट्र बँकेसमोरील एका टपरीवर घडली.
याप्रकरणी पीडित तरुण सद्दाम सलिम शेख (वय ३०, रा. गालीब नगर, धाराशिव) यांनी शनिवारी, ५ एप्रिल रोजी आनंदनगर पोलीस ठाण्यात फिर्याद दिली आहे. मिळालेल्या माहितीनुसार, ४ एप्रिल रोजी रात्री आठ वाजता समीर अलीम शेख (रा. मिली कॉलनी, धाराशिव) याने सद्दाम यांच्याकडे उधारीवर सुपारी मागितली. सद्दाम यांनी नकार देताच समीरने त्यांना शिवीगाळ करण्यास सुरुवात केली आणि लाथाबुक्क्यांनी मारहाण केली. एवढ्यावरच न थांबता त्याने लोखंडी नट-बोल्ट जोडलेल्या वायरने सद्दाम यांना मारहाण करून जखमी केले आणि जीवे ठार मारण्याची धमकी दिली.
सद्दाम शेख यांच्या फिर्यादीवरून आनंदनगर पोलिसांनी आरोपी समीर अलीम शेख याच्याविरुद्ध भारतीय न्याय संहिता (भा.न्या.सं.) कलम ११८(१) (दुखापत करणे), ११५(२) (गंभीर दुखापत करणे ), ३५२ (मारहाण किंवा फौजदारीपात्र बलप्रयोग), आणि ३५१(२)(३) (धमकी देणे) अन्वये गुन्हा नोंदवला आहे. पोलीस या प्रकरणाचा पुढील तपास करत आहेत.
