धाराशिव – धाराशिव शहरातील तुळजापूर नाक्यावर दारू पिण्यास पैसे देण्यास नकार दिल्याने एका ५५ वर्षीय व्यक्तीला मारहाण करण्यात आल्याची घटना घडली आहे.
दिनांक ३ जानेवारी २०२५ रोजी सायंकाळी ४ वाजण्याच्या सुमारास शिवाजी आमृषी कावळे (वय ५५, रा. केकस्थळवाडी) हे देशमुख किराणा दुकानासमोरून जात असताना सदाम शेख (रा. तुळजापूर नाका) आणि नाना गायकवाड (रा. बालाजी नगर) यांनी त्यांना दारू पिण्यासाठी पैसे मागितले. कावळे यांनी पैसे देण्यास नकार दिल्यावरून संतप्त झालेल्या आरोपींनी त्यांना शिवीगाळ करत लाथाबुक्क्यांनी मारहाण केली. एवढेच नव्हे तर आरोपींनी कावळे यांना दगडाने देखील मारहाण करून जखमी केले आणि जिवे मारण्याची धमकी दिली.
या घटनेनंतर कावळे यांनी धाराशिव शहर पोलीस ठाण्यात फिर्याद दाखल केली. त्यांच्या फिर्यादीवरून पोलिसांनी सदाम शेख आणि नाना गायकवाड या दोघांविरुद्ध भादंवि कलम ११८(१), ३५२, ३५१(२), ३(५) अन्वये गुन्हा दाखल केला आहे.
