धाराशिव : दरोडा, जबरी चोरी आणि वाहनचोरी अशा एकूण १७ गंभीर गुन्ह्यांमध्ये पोलिसांना हवा असलेला कुख्यात आरोपी मोतीराम उर्फ कुक्या बादल शिंदे याला जेरबंद करण्यात धाराशिव स्थानिक गुन्हे शाखेला मोठे यश आले आहे. अनेक दिवसांपासून पोलिसांना गुंगारा देणाऱ्या कुक्याला वरुडा पुलाजवळ सापळा रचून शिताफीने ताब्यात घेण्यात आले.
स्थानिक गुन्हे शाखेचे सहाय्यक पोलीस निरीक्षक सुदर्शन कासार आणि त्यांचे पथक २५ जून रोजी जिल्ह्यात गस्त घालत असताना, त्यांना एका गोपनीय बातमीदाराकडून माहिती मिळाली. माहितीनुसार, दरोड्यासारख्या अनेक गुन्ह्यांमध्ये पाहिजे असलेला कुख्यात आरोपी कुक्या शिंदे (रा. मोहा, ता. कळंब) हा काही कामानिमित्त धाराशिव शहराच्या दिशेने येत होता.
या माहितीच्या आधारे, स्थानिक गुन्हे शाखेच्या पथकाने तात्काळ वरुडा पुलाजवळ सापळा रचला आणि कुक्या येताच त्याला मोठ्या कौशल्याने ताब्यात घेतले. चौकशी केली असता, त्याच्यावर धाराशिव, लातूर, बीड आणि अहिल्यानगर या चार जिल्ह्यांमध्ये गुन्हे दाखल असल्याचे निष्पन्न झाले. यामध्ये ५ दरोडे, १ जबरी चोरी, १ दरोड्याचा प्रयत्न आणि १० मोटरसायकल व डिझेल चोरीच्या गुन्ह्यांचा समावेश आहे.
आरोपी कुक्याला पुढील कायदेशीर कारवाईसाठी ग्रामीण पोलीस ठाण्याच्या ताब्यात देण्यात आले आहे.
ही यशस्वी कामगिरी पोलीस अधीक्षक रितू खोखर, अप्पर पोलीस अधीक्षक शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सपोनि सुदर्शन कासार यांच्यासह शौकत पठाण, जावेद काझी, प्रकाश औताडे, फरहान पठाण, नितीन भोसले आणि रत्नदीप डोंगरे यांच्या पथकाने केली आहे.
