धाराशिव – मुलाला गुन्ह्यात मदत करण्याच्या नावाखाली १ लाख रुपयांची लाच मागून ९५ हजार रुपये स्वीकारल्याप्रकरणी रंगेहाथ पकडलेले धाराशिव ग्रामीण पोलीस ठाण्याचे पोलीस निरीक्षक मारोती निवृत्ती शेळके (वय ५४) आणि महिला पोलीस नाईक मुक्ता प्रकाश लोखंडे (वय ३४) यांना आज (गुरुवारी) धाराशिव जिल्हा न्यायालयात हजर करण्यात आले. न्यायालयाने दोघांनाही एक दिवसाची पोलीस कोठडी सुनावली आहे. त्यांना उद्या (शुक्रवारी) पुन्हा न्यायालयात उभे केले जाणार आहे.
काय आहे प्रकरण?
एका ४८ वर्षीय महिलेच्या मुलावर दाखल असलेल्या गुन्ह्यात मदत करण्यासाठी पोलीस निरीक्षक शेळके यांनी १ लाख रुपयांची मागणी केली होती. तडजोडीअंती ९५ हजार रुपये देण्याचे ठरले. महिलेच्या तक्रारीवरून लाचलुचपत प्रतिबंधक विभागाने (ACB) सापळा रचला. ठरल्याप्रमाणे, २५ जून रोजी शासकीय विश्रामगृहाच्या परिसरात महिला पोलीस नाईक मुक्ता लोखंडे यांनी तक्रारदार महिलेकडून ९५ हजार रुपये स्वीकारताच, ACB च्या पथकाने त्यांना रंगेहाथ पकडले. या प्रकरणी लाच स्वीकारण्यास प्रोत्साहन दिल्याबद्दल शेळके यांनाही ताब्यात घेण्यात आले.
थरारक पलायननाट्य
या प्रकरणाला नाट्यमय वळण तेव्हा मिळाले, जेव्हा बुधवारी रात्री गुन्हा दाखल करण्याची प्रक्रिया सुरू असताना पोलीस निरीक्षक शेळके यांनी ACB अधिकाऱ्यांच्या हातावर तुरी देऊन कार्यालयातून पलायन केले. यानंतर शहरात थरारनाट्य रंगलं. पुढे पळणारे शेळके आणि मागे लागलेले ACB चे पथक, असा फिल्मी पाठलाग काही काळ चालला. अखेर, लेडीज क्लब समोरील रस्त्यावर अथक प्रयत्नांनंतर ACB पथकाने शेळके यांच्या पुन्हा मुसक्या आवळल्या. हा संपूर्ण थरार सीसीटीव्हीत कैद झाला आहे.
न्यायालयीन प्रक्रिया
पलायननाट्यानंतर आज, गुरुवारी, मारोती शेळके आणि मुक्ता लोखंडे यांना न्यायालयात हजर करण्यात आले असता, न्यायालयाने त्यांना अधिक तपासासाठी एक दिवसाची पोलीस कोठडी मंजूर केली. या प्रकरणात लाचखोरीसोबतच शासकीय ताब्यातून पळून जाण्याचाही गुन्हा दाखल झाल्याने शेळके यांच्या अडचणीत मोठी वाढ झाली आहे. या घटनेमुळे संपूर्ण पोलीस दलात खळबळ उडाली असून, खाकी वर्दीच्या प्रतिष्ठेला मोठा धक्का बसला आहे.
