धाराशिव: शहरातील फकीरानगर भागात कत्तलीच्या उद्देशाने निर्दयपणे डांबून ठेवलेली सुमारे १ लाख १५ हजार रुपये किमतीची गोवंशीय जनावरे पोलिसांनी छाप्यात जप्त केली आहेत. चारा-पाण्याची कोणतीही व्यवस्था न करता या जनावरांना बांधून ठेवल्याप्रकरणी एका व्यक्तीवर धाराशिव शहर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फकीरानगर (वैराग नाका, धाराशिव) येथे १४ मार्च रोजी दुपारी ४.२० वाजेच्या सुमारास ही कारवाई करण्यात आली. अमजद बशीद कुरेशी (रा. फकीरानगर, धाराशिव) याने आपल्या ताब्यात एक जर्सी बैल आणि गावरान गाईचे ४ खोंड अशी एकूण १ लाख १५ हजार रुपये किमतीची जनावरे कत्तल करण्याच्या उद्देशाने बेकायदेशीररीत्या बांधून ठेवली होती. या जनावरांसाठी चारा आणि पाण्याची कोणतीही सोय न करता त्यांना अत्यंत क्रूरपणे वागवले जात असल्याचे धाराशिव शहर पोलिसांच्या निदर्शनास आले.
या माहितीवरून पोलिसांनी घटनास्थळी धाव घेत कारवाई केली आणि सर्व जनावरांची सुटका केली. याप्रकरणी पोलिसांतर्फे देण्यात आलेल्या फिर्यादीवरून आरोपी अमजद कुरेशी याच्याविरुद्ध प्राण्यांना क्रूरतेने वागवण्यास प्रतिबंध करण्याबाबतचा अधिनियम कलम ११(१)(ब) सह महाराष्ट्र पशुसंरक्षण अधिनियम ५(अ) अन्वये गुन्हा नोंदवण्यात आला आहे. या घटनेचा पुढील तपास धाराशिव शहर पोलीस करत आहेत.
