येरमाळा: वाशी तालुक्यातील तेरखेडा येथे मध्यरात्री अज्ञात चोरट्यांनी घराचे गेट तोडून आत प्रवेश करत कपाटातील तब्बल ३ लाखांचा मुद्देमाल लंपास केला. यात १६७ ग्रॅम सोन्याचे दागिने आणि ७० हजार रुपयांच्या रोख रकमेचा समावेश आहे. ही घटना ११ मार्च रोजी पहाटेच्या सुमारास घडली असून, याप्रकरणी येरमाळा पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, वंदना शंकर साळवे (वय ५८, रा. तेरखेडा, ता. वाशी, जि. धाराशिव) यांच्या घरी हा चोरीचा प्रकार घडला. ११ मार्च रोजी पहाटे २ ते ५ वाजेच्या सुमारास अज्ञात चोरट्यांनी त्यांच्या घराच्या गेटची कडी/कुलूप कट करून घरात प्रवेश केला. त्यानंतर घरातील कपाट फोडून त्यातील १६७ ग्रॅम वजनाचे सोन्याचे दागिने आणि ७० हजार रुपये रोख असा एकूण २ लाख ९९ हजार ९५० रुपये किमतीचा ऐवज चोरून नेला.
घरी चोरी झाल्याचा प्रकार लक्षात आल्यानंतर वंदना साळवे यांनी १४ मार्च रोजी येरमाळा पोलीस ठाण्यात धाव घेत फिर्याद दिली. त्यांनी दिलेल्या प्रथम खबरेवरून अज्ञात चोरट्यांविरुद्ध भारतीय न्याय संहिता (BNS) कलम ३३१(४) आणि ३०५(ब) नुसार गुन्हा दाखल करण्यात आला आहे. या घटनेमुळे परिसरात भीतीचे वातावरण असून, पुढील तपास येरमाळा पोलीस करत आहेत.
