राजकारणात ‘नारळ फोडणे’ आणि ‘हात दाखवून अवलक्षण करणे’ यात फार बारीक अंतर असतं, याचा प्रत्यय सध्या धाराशिवच्या जनतेला चांगलाच येतोय. झालं असं की, छत्रपती संभाजीनगरात १७ सप्टेंबरला मराठवाडा मुक्ती संग्राम दिनाच्या मुहूर्तावर शिवसेना (उबाठा) पक्षाने ‘तुमसे ना हो पाएगा’ म्हणत सरकारच्या कारभाराची पिसे काढली. माजी विरोधी पक्षनेते अंबादास दानवे यांनी भरसभेत भाजप आमदार राणा जगजितसिंह पाटील यांच्या ‘जल-अद्भुत चमत्कारा’चा पर्दाफाश केला; आणि काय आश्चर्य! राणा दादांच्या गोटात इतका मोठा राजकीय फटाका वाजला की, थेट धूर तुळजापुरात निघाला.
‘डिसेंबर २०२४’चं ते अदृश्य पाणी!
२०२४ च्या निवडणुकीच्या तोंडावर माहौल कसा तयार करायचा, यात राणा दादांचा हातखंडा. ‘कृष्णा-मराठवाडा सिंचन योजने’चं काम फत्ते झालंय, डिसेंबर २०२४ पर्यंत रामदरा तलावात लाटा उसळतील, असा दावा करत सिंदफळ पंप हाऊसवर नारळ फोडण्यात आला. कॅमेऱ्यांचे फ्लॅश चमकले, हारतुरे पडले, भाषणं झाली. पण आज दोन वर्षे उलटली, तरी रामदरा तलावात पाण्याचा थेंब नाही, फक्त कोरडी धूळ उडतेय! राणा दादांच्या ‘डिजिटल पाईपलाईन’मधून पाणी कधी प्रत्यक्षात जमिनीवर उतरणार, याचं उत्तर मात्र कोणाकडेच नाही. अंबादास दानवेंनी भरसभेत हाच साधा प्रश्न विचारला: “दादा, पाणी गेलं कुठं?”
सत्याचा झटका आणि कार्यकर्त्यांची नौटंकी
दानवेंनी नेमक्या दुखऱ्या नसेवर बोट ठेवताच राणा दादांच्या कार्यकर्त्यांचा पार तिळपापड झाला. ‘तुझे मिर्ची लगी तो मैं क्या करू?’ या चालीवर कार्यकर्त्यांनी आत्मपरीक्षण सोडून तुळजापुरात थेट दानवेंच्या प्रतिमेला ‘जोडे मारो’ आंदोलनाचा फड मांडला. आता प्रश्न असा पडतो की, पाणी न आल्याची विचारणा केली म्हणून एवढा राग? की खोटं उघडं पडल्यामुळे जळफळाट?
दुष्काळाने होरपळणाऱ्या धाराशिवची आज अवस्था काय आहे? दोन महिन्यांपासून पाऊस नाही, उभं सोयाबीन डोळ्यादेखत करपून गेलं, गुरांच्या दावणीला चारा नाही, घशाला कोरड पडलीये आणि शेतकरी दुष्काळ जाहीर करा म्हणून टाहो फोडतायत. अशा गंभीर वेळी शेतकऱ्यांच्या बांधावर जाऊन पाण्याचा हिशोब देण्याऐवजी, राणा दादांचे शिलेदार रस्त्यावर उतरून जोडे आपटण्यात धन्यता मानत आहेत!
जोड्यांना दुग्धाभिषेकाचे उत्तर
भाजपच्या या बालीश नौटंकीला शिवसैनिकांनीही जोरदार शैलीत प्रत्युत्तर दिलं. दानवेंच्या प्रतिमेला दुग्धाभिषेक घालत शिवसैनिकांनी दाखवून दिलं की, जोडे मारल्याने जनतेच्या डोळ्यातली धूळ साफ होत नसते. उलट, तुमची पोलखोल झाली की तुम्ही किती अस्वस्थ होता, हेच यातून सिद्ध झालं.
राणा दादा, राजकारण भाषणांवर आणि उद्घाटनांच्या पाट्यांवर चालतं, पण शेती आणि माणसांचा घसा पाण्यानेच ओला होतो. निवडणुका आल्या की पंप हाऊसचे फिती कापणे सोपे असते, पण दोन वर्षानंतरही कोरड्या पडलेल्या पाटांकडे बघून जनतेला जाब देणे कठीण असते. जनतेच्या हक्काच्या कृष्णा-मराठवाडा योजनेवर प्रश्न विचारले तर मिरच्या झोंबणारच; पण कितीही आदळआपट केली तरी मराठवाड्याच्या हक्काच्या पाण्याचा हिशोब तर द्यावाच लागेल!
