धाराशिव: देशी बनावटीचे पिस्तूल व जिवंत काडतुसे बेकायदेशीररीत्या बाळगणाऱ्या दोन सराईत गुन्हेगारांना स्थानिक गुन्हे शाखा, धाराशिवच्या पथकाने भूम परिसरातून अटक केली आहे. या कारवाईमुळे एका जबरी चोरीच्या गुन्ह्याचा उलगडा झाला असून, हे दोघे जिल्ह्यातील इतर १० गंभीर गुन्ह्यांमध्ये पाहिजे असलेले आरोपी असल्याचे निष्पन्न झाले आहे.
स्थानिक गुन्हे शाखेचे सपोनि सुदर्शन कासार व त्यांचे पथक २१ सप्टेंबर रोजी चोरीचे गुन्हे उघडकीस आणण्यासाठी व फरारी आरोपींचा शोध घेण्यासाठी गस्त घालत होते. या दरम्यान मिळालेल्या गोपनीय बातमीच्या आधारे पथकाने भूम परिसरात संशयास्पदरीत्या फिरणाऱ्या दोघांना ताब्यात घेतले. त्यांची अंगझडती घेतली असता त्यांच्याकडे एक देशी बनावटीचे पिस्तूल आणि तीन जिवंत काडतुसे मिळून आली. याप्रकरणी भूम पोलीस ठाण्यात गुन्हा रजि. नं. ४९५/२०२६ अन्वये आर्म्स ॲक्टनुसार गुन्हा दाखल करण्यात आला आहे.
अटकेतील आरोपींची नावे:
१. अनिल उर्फ शेंड्या आबा काळे (वय २४ वर्षे)
२. पवन उर्फ छगन महादेव काळे (वय २१ वर्षे)
(दोघे रा. खामकरवाडी, पारधी पिढी, ता. वाशी, जि. धाराशिव)
चौकशीत चोरीचा गुन्हा उघडकीस:
पोलिसांनी आरोपींकडे अधिक चौकशी केली असता, भूम पोलीस ठाण्यातील जबरी चोरीचा गुन्हा (रजि. नं. ४३९/२०२६) उघडकीस आला. त्यांच्याकडून चोरीस गेलेली ५ ग्रॅम वजनाची सोन्याची अंगठी (किंमत अंदाजे ₹४०,०००) हस्तगत करण्यात आली आहे. पोलिसांनी आरोपींकडून पिस्तूल, काडतुसे आणि सोन्याची अंगठी असा मिळून एकूण ₹७१,००० किमतीचा मुद्देमाल जप्त केला आहे. दोन्ही आरोपींची वैद्यकीय तपासणी करून पुढील कायदेशीर कारवाईसाठी त्यांना भूम पोलीस ठाण्याच्या हवाली करण्यात आले आहे.
तपासाला गती:
दोन्ही आरोपी धाराशिव जिल्ह्यातील सुमारे १० वेगवेगळ्या गुन्ह्यांत निष्पन्न व पाहिजे असलेले आरोपी असल्याने या अटकेमुळे अनेक प्रकरणांतील तपासाला महत्त्वपूर्ण दिशा मिळाली आहे.
ही धडक कारवाई पोलीस अधीक्षक श्रीमती रितु खोखर व अप्पर पोलीस अधीक्षक सचिन पांडकर यांच्या मार्गदर्शनाखाली पोलीस निरीक्षक विनोद इज्जपवार, सपोनि सुदर्शन कासार, पोलीस अंमलदार शौकत पठाण, प्रकाश औताडे, जावेद काझी, फरहान पठाण, नागनाथ गुळवे, रत्नदीप डोंगरे व आरसीपी पथकाने यशस्वीरीत्या पार पाडली.
