नमस्कार वाचकहो! ‘धाराशिव लाइव्ह’च्या या भन्नाट मालिकेत आज आपण फेसबुक पिंट्या साहेबांच्या ‘जल-विज्ञानाचा’ एक अत्यंत अजब आणि हास्यास्पद नमुना बघणार आहोत. धरणात पाण्याचा थेंब शिल्लक नाही, नळातून हवा येत आहे, पण आपले साहेब मात्र ‘जलशुद्धीकरण’ प्रकल्पाचे थाटामाटात उद्घाटन करून ‘जलपूजन’ करत आहेत!
चला तर मग, पाहूया साहेबांच्या या नव्या ‘उद्घाटन एक्सप्रेस’चा आणि नळदुर्गकरांना दाखवलेल्या खोट्या आश्वासनांचा पंचनामा!
१. आडातच नाही, तर पोहऱ्यात कुठून येणार?
नळदुर्ग, तुळजापूर शहर आणि अणदूर यांसारख्या मोठ्या गावांची तहान एकट्या ‘बोरी धरणा’वर भागते. पण सत्य परिस्थिती अशी आहे की, गेल्या दोन महिन्यांपासून पावसाचा थेंब नाही. बोरी धरणातील पाण्याची पातळी भयानक वेगाने घटली असून धरण तळाला गेले आहे. हे पाणी वर्षभर तरी पुरेल का? याबाबत मोठी साशंकता आहे.
सध्या शहरात १० दिवसांतून एकदाच पाणीपुरवठा होत आहे. जनतेचे पाण्यासाठी हाल-हाल सुरू आहेत. पण फेसबुक पिंट्या साहेबांनी नळदुर्गला जाऊन ‘नव्या अत्याधुनिक जलशुद्धीकरण प्रकल्पाचे’ थाटात जलपूजन केले आणि घोषणा केली- “येत्या महिनाभरात गावाला शुद्ध व नियमित पाणीपुरवठा सुरू होणार!” अरे साहेब, जेव्हा धरणातच पाणी नाही (आडातच नाही), तर त्या मशीनमधून तुम्ही शुद्ध करून लोकांना काय वाटणार? हवा की गाळ?
२. पाण्याची भ्रांत अन् साहेबांचे ‘नमो उद्याना’चे गाजर!
नळदुर्गकरांचा घसा कोरडा पडला असताना, साहेबांना मात्र उद्घाटनांचा आणि इव्हेंटचा चांगलाच सपाटा लागला आहे. साहेबांनी या जलपूजनासोबतच ‘नमो उद्याना’चे भूमीपूजनही उरकून घेतले.
एवढंच नाही, तर साहेबांनी आश्वासनांची अक्षरशः खैरात वाटली! साहेब म्हणाले, “नळदुर्ग तालुका निर्मिती करू, पर्यटन विकास करू, रोजगार आणू आणि विश्रामगृह बांधू!” साहेब, माणसांना प्यायला पाणी नाहीये आणि तुम्ही त्यांना उद्यानात फिरण्याचे आणि विश्रामगृहात झोपण्याचे गाजर दाखवत आहात? ही निव्वळ जनतेच्या जखमेवर मीठ चोळण्याची कृती आहे!
३. दोन वर्षांपूर्वीचीच कॅसेट पुन्हा: रामदरा तलाव अन् कृष्णा खोरे!
साहेबांनी या कार्यक्रमात आणखी एक मोठी पुडी सोडली- “पुढील महिन्यात उजनीचे पाणी रामदरा तलावात येणार, त्याची चाचणी होणार!”
हे ऐकून नळदुर्गकरांना दोन वर्षांपूर्वीचा काळ आठवला! कृष्णा खोऱ्याचे २१ टीएमसी पाणी येणार म्हणून साहेब गेल्या दोन वर्षांपासून अशीच दवंडी पिटत आहेत. विधानसभा निवडणुकीच्या अगोदर साहेबांनी याच पाण्याचे एकतर्फी ‘उद्घाटन’ही केले होते आणि मोठ्या रुबाबात ‘डिसेंबरमध्ये पाणी येणार’ असा शब्द दिला होता. आज त्या गोष्टीला दोन वर्षे पूर्ण झाली… ना तो ‘डिसेंबर’ आला, ना कृष्णा खोऱ्याचा पाण्याचा पत्ता लागला! आता साहेब तीच जुनी कॅसेट पुन्हा रामदरा तलावाच्या नावाने वाजवत आहेत.
४. आमचा साहेबांना थेट सवाल!
फेसबुक पिंट्या साहेब, आता गोलगोल फिरवू नका, थेट सांगा-
-
जेव्हा बोरी धरण कोरडे पडत आले आहे, तेव्हा तुम्ही महिनाभरात ‘नियमित पाणी’ कुठून आणणार आहात?
-
कृष्णा खोऱ्याचे जे पाणी दोन वर्षांपूर्वीच ‘डिसेंबर’मध्ये येणार होते, ते नक्की कोणत्या दशकात येणार आहे?
-
की आता जनता तहानलेली असताना त्यांना फक्त ‘नमो उद्यानाची’ आणि ‘विश्रामगृहाची’ स्वप्ने दाखवून तुम्ही तुमची मते शुद्ध करून घेणार आहात?
तात्पर्य: साहेबांचा हा उद्घाटनांचा इव्हेंट म्हणजे निव्वळ ‘दुष्काळात तेरावा महिना’ आहे. पाणी टंचाईत होरपळणाऱ्या जनतेला साहेबांचे हे खोटे आश्वासनांचे ‘पॅकेज’ आता बरोबर समजले आहे.
कारण विसरू नका… “यह पब्लिक है, सब जाणती है!”
