धाराशिव : धाराशिव जिल्ह्यात चोरांनी चांगलाच धुमाकूळ घातला असून, सामान्य नागरिकांच्या घरांबरोबरच आता पायाभूत सुविधांच्या साहित्यावरही डल्ला मारला जात आहे. तुळजापूर तालुक्यात एका घरातून सव्वा लाखाचा ऐवज लंपास झाला, तर वाशी तालुक्यात वीज मनोऱ्याचे लोखंडी अँगल आणि तब्बल ५०० मीटर विद्युत तार चोरून नेल्याच्या घटना उघडकीस आल्या आहेत. या सर्व घटनांप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
सुरतगाव येथे घरफोडी, सव्वा लाखाचा मुद्देमाल लंपास
तुळजापूर तालुक्यातील सुरतगाव येथे चोरट्यांनी एका बंद घराला लक्ष्य केले. येथील रहिवासी असलेले रविंद्र नारायण कुंभार (वय ४२) यांच्या घराचा कडी-कोंडा तोडून चोरट्यांनी आत प्रवेश केला. ही घटना २५ जून रोजी मध्यरात्री दोनच्या सुमारास घडली. चोरट्यांनी घरातील लोखंडी कपाटात ठेवलेले २१ ग्रॅम सोन्याचे दागिने, चांदीचे दागिने आणि ७०,००० रुपयांची रोकड असा एकूण १ लाख २५ हजार रुपयांचा ऐवज चोरून नेला. याप्रकरणी रविंद्र कुंभार यांनी दिलेल्या फिर्यादीवरून तामलवाडी पोलीस ठाण्यात अज्ञात चोरट्यांविरुद्ध गुन्हा नोंदवण्यात आला आहे.
वाशी तालुक्यात थेट वीज कंपन्यांच्या साहित्यावरच हात साफ
- पहिल्या घटनेत, तांदुळवाडी शिवारातील एका विद्युत वाहिनीच्या मनोऱ्याच्या पायाचे सुमारे २० हजार रुपये किमतीचे लोखंडी अँगल अज्ञात व्यक्तीने चोरून नेले. ही घटना १९ जून रोजी घडली. याप्रकरणी के.एस. विंड अँड रेव्हिनेबल कंपनीचे प्रोजेक्ट मॅनेजर शशीकुमार शक्तीवेल यांनी दिलेल्या तक्रारीवरून वाशी पोलिसांनी गुन्हा दाखल केला आहे.
- दुसऱ्या घटनेत, सरमकुंडी शिवारात शेतातून जाणाऱ्या तब्बल ५०० मीटर ॲल्युमिनियमच्या विद्युत तारा चोरट्यांनी कापून नेल्या. या तारांची किंमत अंदाजे १ लाख ७८ हजार रुपये आहे. ही घटना ६ जून रोजी घडली असून, याप्रकरणी झेड कन्स्ट्रक्शन कंपनीचे सुपरवायझर ओंकार किसनदास राठोड यांनी दिलेल्या तक्रारीवरून वाशी पोलीस ठाण्यात गुन्हा दाखल करण्यात आला आहे.
एकाच दिवशी जिल्ह्यात नोंद झालेल्या या घटनांमुळे नागरिकांमध्ये भीतीचे वातावरण असून, चोरांना लवकरात लवकर जेरबंद करण्याचे आव्हान पोलिसांसमोर आहे.
