धाराशिव | धाराशिव जिल्ह्यात तुळजापूर, मुरूम आणि वाशी पोलीस ठाण्यांच्या हद्दीत चोरीच्या तीन स्वतंत्र घटना घडल्या असून अज्ञात चोरट्यांविरोधात गुन्हे दाखल करण्यात आले आहेत. या घटनांमध्ये सोन्याचे दागिने, रोकड तसेच दोन कालवडी असा एकूण सुमारे ८७ हजार रुपयांचा मुद्देमाल लंपास झाला आहे.
तुळजापूरमध्ये घरफोडी
तुळजापूर येथील स्वास्तिक प्राईम कॉलनीतील रहिवासी भाग्यश्री अनिल कुलकर्णी (वय ४१) यांच्या बंद घराचे गेट उघडून दरवाजाची लॉकपट्टी तोडत चोरट्यांनी घरात प्रवेश केला. १२ जुलै रोजी दुपारी २.४५ ते १५ जुलै रोजी सकाळी ८.४५ या कालावधीत ही चोरी झाली. घरातील ५ ग्रॅम सोन्याचे दागिने व ३० हजार रुपयांची रोकड, असा ५० हजार रुपयांचा ऐवज चोरून नेण्यात आला. याप्रकरणी भाग्यश्री कुलकर्णी यांच्या फिर्यादीवरून तुळजापूर पोलीस ठाण्यात भारतीय न्याय संहिता कलम ३३१(४), ३०५ अन्वये गुन्हा दाखल करण्यात आला आहे.
मुरूममध्ये घरफोडी
उमरगा तालुक्यातील कोथळी येथील सचिन सिद्राम कुलकर्णी (वय २७) यांच्या घराचे कुलूप तोडून अज्ञात चोरट्यांनी घरात प्रवेश केला. १५ जुलै रोजी पहाटे ४ ते सकाळी ८ वाजण्यापूर्वी ही घटना घडली. घरातील ५ ग्रॅम सोन्याचे दागिने, दोन गुंड्या, दोन साकळ्या आणि १० हजार रुपयांची रोकड, असा १९ हजार रुपयांचा मुद्देमाल चोरून नेण्यात आला. याप्रकरणी मुरूम पोलीस ठाण्यात भारतीय न्याय संहिता कलम ३३१(४), ३०५(ए), ६२ अन्वये गुन्हा नोंदविण्यात आला आहे.
वाशी तालुक्यात शेतातून दोन कालवडी चोरी
वाशी तालुक्यातील पारा शिवारात अज्ञात चोरट्यांनी शेतातून दोन कालवडी चोरून नेल्या. गोरख बलभिम भराटे यांची सुमारे १० हजार रुपये किंमतीची कालवड आणि नरहरी लिंबाजी ढेंगळे यांची ८ हजार रुपये किंमतीची कालवड, असा १८ हजार रुपयांचा ऐवज १४ जुलै रोजी पहाटे ३.३० ते ४.३० या वेळेत चोरीला गेला. गोरख भराटे यांच्या फिर्यादीवरून वाशी पोलीस ठाण्यात भारतीय न्याय संहिता कलम ३०३(२) अन्वये गुन्हा दाखल करण्यात आला असून पोलीस पुढील तपास करीत आहेत.
