धाराशिव: जिल्ह्यातील पवनचक्की प्रकल्पांमधून विद्युत वाहिनीच्या तारा चोरणाऱ्या टोळीचा स्थानिक गुन्हे शाखेने (LCB) पर्दाफाश केला आहे. पोलिसांनी याप्रकरणी दोन आरोपींना शिताफीने अटक केली असून, त्यांच्याकडून वाहनांसह एकूण १६.७० लाख रुपयांचा मुद्देमाल जप्त करण्यात आला आहे. या मोठ्या कारवाईमुळे पवनचक्कीच्या तारा चोरीचे एकूण ४ गुन्हे उघडकीस आले आहेत.
गेल्या काही दिवसांपासून धाराशिव जिल्ह्यात पवनचक्की प्रकल्पांमधून विद्युत तारा चोरी जाण्याच्या घटना घडत होत्या. हे गुन्हे गंभीर आणि अतिसंवेदनशील स्वरूपाचे असल्याने, धाराशिवच्या पोलीस अधीक्षक श्रीमती रितू खोखर यांनी स्थानिक गुन्हे शाखेचे पोलीस निरीक्षक विनोद इज्जपवार यांना हे गुन्हे तात्काळ उघडकीस आणण्याचे स्पष्ट आदेश दिले होते.
या आदेशानुसार, दिनांक २४ जुलै २०२६ रोजी गोपनीय बातमीदाराकडून मिळालेल्या माहितीच्या आधारे स्थानिक गुन्हे शाखेचे सहायक पोलीस निरीक्षक (सपोनि) कासार व त्यांच्या पथकाने सापळा रचला. त्यांनी वाशी तालुक्यातील बोरी पाटी पारधी पिढी येथून दोन संशयित आरोपींना त्यांच्या महिंद्रा स्कॉर्पिओ आणि अशोक लेलँड दोस्त या वाहनांसह ताब्यात घेतले. पोलिसांनी आरोपींकडे सखोल चौकशी केली असता, त्यांनी आपल्या अन्य साथीदारांच्या मदतीने आंबेवाडी, बरमगाव, लोहारा आणि कळदेव निबाळा शिवारातील पवनचक्की प्रकल्पांवरील तारा चोरल्याची कबुली दिली.
२९९ किलो तारा आणि दोन वाहने जप्त
पोलिसांनी ताब्यात घेतलेल्या आरोपींकडून तब्बल २९९ किलो वजनाच्या विद्युत वाहिनीच्या तारा हस्तगत केल्या आहेत. तसेच, गुन्ह्यात वापरलेली एक महिंद्रा स्कॉर्पिओ आणि एक अशोक लेलँड दोस्त गाडी असा एकूण १६ लाख ७० हजार रुपयांचा मुद्देमाल जप्त केला आहे. आरोपींची वैद्यकीय तपासणी पूर्ण करून पुढील कायदेशीर कारवाईसाठी त्यांना बेंबळी पोलीस ठाण्याच्या ताब्यात देण्यात आले आहे.
सदरची यशस्वी कामगिरी पोलीस अधीक्षक श्रीमती रितू खोखर आणि अपर पोलीस अधीक्षक सचिन पांडकर यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक विनोद इज्जपवार, सपोनि सुदर्शन कासार, पोलीस हवालदार शौकत पठाण, प्रकाश औताडे, जावेद काझी, फरहान पठाण आणि चालक पोलीस हवालदार रत्नदीप डोंगरे यांच्या पथकाने ही कारवाई केली.
