तामलवाडी पोलीस ठाणे अंतर्गत येणाऱ्या वडगाव काटी येथे एका शेतकऱ्याने कौटुंबिक वादातून आत्महत्या केल्याची दुर्दैवी घटना घडली आहे. मृत बाळासाहेब अशोक सुरवसे यांनी 20 ऑक्टोबर 2023 रोजी आपल्या शेतातील लिंबाच्या झाडाला गळफास लावून जीवन संपवले.
या घटनेप्रकरणी मयताच्या पत्नी सुवर्णा बाळासाहेब सुरवसे आणि नातेवाईक कृष्णाथ उर्फ आबा रामलिंग म्हमाने यांच्याविरुद्ध भादंवि कलम 306, 34 अन्वये गुन्हा दाखल करण्यात आला आहे. मयताचे भाऊ महादेव अशोक सुरवसे यांनी दिलेल्या फिर्यादीनुसार, आरोपींनी मागील काही दिवसांपासून बाळासाहेब यांना कौटुंबिक वादातून सतत त्रास दिला होता. यामुळे कंटाळून बाळासाहेब यांनी हे टोकाचे पाऊल उचलल्याचे सांगण्यात येत आहे.पोलिसांनी आकस्मिक मृत्यूची नोंद करून पुढील तपास सुरू केला आहे.
