धाराशिव : राज्याचे आरोग्य मंत्री आणि धाराशिवचे पालकमंत्री तानाजी सावंत यांचे पुतणे धनंजय सावंत यांच्या सोनारी येथील घरासमोर गोळीबार झाल्याची घटना समोर आली आहे. गुरुवारी मध्यरात्री 12 वाजून 37 मिनिटांनी ही घटना घडली. दोन अज्ञात इसम दुचाकीवरून आले आणि त्यांनी सावंत यांच्या घरासमोर गोळीबार केला असल्याचा दावा धनंजय सावंत यांच्या सुरक्षा रक्षकाने केला आहे.
सुरक्षा रक्षकाच्या तक्रारीनुसार, गोळीबारानंतर या दोन्ही अज्ञात इसमांनी तिथून पळ काढला. या घटनेनंतर सावंत यांच्या सुरक्षा रक्षकाने आंबी पोलीस ठाण्यात तक्रार दाखल केली. पोलिसांनी या तक्रारीनुसार गुन्हा नोंदवून तपास सुरू केला आहे. घटनास्थळी पोलिसांनी भेट देऊन पुरावे गोळा करण्यास सुरुवात केली असून परिसरातील सीसीटीव्ही फुटेज तपासले जात आहे.
वादाची पार्श्वभूमी:
घटनेच्या काही दिवसांपूर्वी पालकमंत्री तानाजी सावंत यांच्या दौऱ्यादरम्यान खंडेश्वरी प्रकल्पाच्या कामावरून वाद उद्भवला होता. या वादात उद्धव ठाकरे गट – शरद पवार गट आणि तानाजी सावंत यांच्या गटाच्या कार्यकर्त्यांमध्ये बाचाबाची झाली होती. त्या वेळी धनंजय सावंत हेही घटनास्थळी उपस्थित होते. या वादात वादग्रस्त विषय आणि तणावपूर्ण परिस्थिती निर्माण झाली होती.
पोलिसांच्या माहितीनुसार, या गोळीबाराचा आणि त्या वादाचा काही संबंध आहे का, याचीही चौकशी केली जात आहे. गोळीबार नेमका कोणत्या कारणामुळे झाला, याचा शोध घेतला जात आहे. या घटनेत कोणी जखमी झाले नाही, मात्र परिसरात तणावाचे वातावरण निर्माण झाले आहे.
परंडा मतदारसंघातील राजकीय संघर्ष: तणावपूर्ण वातावरण आणि सत्तासंघर्षाची तीव्रता
पोलिस तपास सुरू
सध्या पोलिसांनी घटनास्थळी पंचनामा करून तपासाची दिशा ठरवली आहे. गोळीबारामागील कारणांचा शोध घेण्यासाठी धनंजय सावंत आणि त्यांचे सुरक्षा रक्षक यांच्याकडून माहिती घेतली जात आहे. गोळीबार करणारे दोन्ही इसम अद्याप पोलिसांच्या हाती लागले नाहीत, मात्र त्यांचा माग काढण्यासाठी पोलिसांनी परिसरातील सीसीटीव्ही फुटेजची तपासणी सुरू केली आहे.
धनंजय सावंत यांनी या घटनेनंतर स्वतःच्या सुरक्षेबाबत चिंता व्यक्त केली आहे. त्यांचा आणि त्यांच्या कुटुंबाचा जीव धोक्यात असल्याचे त्यांनी सांगितले. हा गोळीबार नेमका कोणत्या कारणामुळे झाला, याची ठोस माहिती मिळाली नसली तरी स्थानिक राजकीय तणाव या घटनेशी संबंधित असण्याची शक्यता वर्तवली जात आहेपोलिस अधीक्षकांनी दिलेल्या माहितीनुसार, लवकरच या प्रकरणाचा तपास पूर्ण केला जाईल आणि दोषींवर कडक कारवाई केली जाईल.
धनंजय सावंत यांनी या घटनेबाबत चिंता व्यक्त करत, अलीकडेच परंडा तालुक्यात खंडेश्वरी प्रकल्पाच्या कार्यक्रमात एका कार्यकर्त्याने सुरक्षा तोडून बंदूक आणल्याची घटना घडल्याचे सांगितले. या दोन्ही घटनांच्या मागे कोण आहे याचा तपास पोलीसांनी करावा, अशी मागणी त्यांनी केली आहे.
या घटनेमुळे परंडा आणि धाराशिवमध्ये संताप व्यक्त होत आहे. परंड्यात शिवसैनिकांनी रस्ता रोको करून या घटनेचा निषेध केला आणि हल्लेखोरांना तात्काळ अटक करण्याची मागणी केली. धाराशिवमध्येही शिवसेना (शिंदे गट) च्या जिल्हाध्यक्षांनी या घटनेचा निषेध करून हल्लेखोरांना लवकरात लवकर अटक करण्याची मागणी केली आहे.
राज्याचे मुख्यमंत्री एकनाथ शिंदे हे उद्या शनिवारी परंडा दौऱ्यावर येत आहेत, त्याच्या अगोदरच परंडा तालुक्यात राजकीय संघर्ष सुरु झाला आहे. पालकमंत्री तानाजी सावंत यांना विरोधी पक्षाचे कार्यकर्ते येनकेन प्रकारे टार्गेट करीत आहेत. त्यामुळे तणाव वाढत चालला आहे.
