उमरगा – कोरेगाववाडी येथील ग्रामविकास अधिकारी सौ. शुभांगी संभाजी वाघमोडे यांना जीवे मारण्याची धमकी देऊन त्यांच्याकडून चार लाख रुपये खंडणी मागितल्याप्रकरणी उमरगा पोलीस ठाण्यात तक्रार दाखल करण्यात आली आहे. या प्रकरणी शेषेराव लवटे आणि त्यांच्या चार ते पाच साथीदारांना आरोपी करण्यात आले आहे.
सौ. वाघमोडे यांनी दिलेल्या तक्रारीनुसार, शेषेराव लवटे यांनी माहिती अधिकार कायद्यांतर्गत काही माहिती मागविली होती. ही माहिती सौ. वाघमोडे यांनी नियमानुसार दिली होती. मात्र, लवटे यांनी या माहितीबाबत समाधानी नसल्याचे दाखवत सौ. वाघमोडे यांच्यावर दबाव आणण्याचा प्रयत्न केला. त्यांनी सौ. वाघमोडे यांना जीवे मारण्याची धमकी देऊन त्यांच्याकडून चार लाख रुपये खंडणी मागितली. सौ. वाघमोडे यांनी पैसे देण्यास नकार दिल्याने, लवटे आणि त्यांच्या साथीदारांनी त्यांच्यावर हल्ला करण्याचा प्रयत्न केला.
या घटनेनंतर सौ. वाघमोडे यांनी उमरगा पोलीस ठाण्यात तक्रार दाखल केली. पोलिसांनी या प्रकरणी गुन्हा दाखल करून तपास सुरू केला आहे.
