धाराशिव – तालुक्यातील कोंड येथील वजीर महंमद शेख इनामदार (वय ६३) यांच्या राहत्या घराचे कुलूप तोडून अज्ञात चोरट्याने ४० हजार रुपये किमतीचे सोन्याचे दागिने, रोख रक्कम व महत्वाची कागदपत्रे चोरून नेल्याची घटना २४ जुलै रोजी घडली. याप्रकरणी ढोकी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, २४ जुलै रोजी रात्रीच्या सुमारास अज्ञात चोरट्याने शेख इनामदार यांच्या राहत्या घराचे कुलूप तोडले. घरात प्रवेश करून कपाटात ठेवलेले ५ ग्रॅम वजनाचे सोन्याचे दागिने, ३० हजार रुपये रोख रक्कम, गॅसची टाकी, चेकबुक, पासबुक व इतर महत्वाची कागदपत्रे चोरून नेली.
या घटनेची माहिती मिळताच शेख इनामदार यांनी २५ जुलै रोजी ढोकी पोलीस ठाण्यात तक्रार दाखल केली. पोलिसांनी भारतीय दंड संहिता कलम ३८०, ४५४ अन्वये अज्ञात चोरट्याविरुद्ध गुन्हा दाखल करून तपास सुरू केला आहे.
