भूममध्ये दुधात भेसळ करणाऱ्या मोठ्या रॅकेटचा पर्दाफाश!

भूम: अन्न पदार्थांमध्ये (विशेषतः दुधामध्ये) पावडरची रासायनिक भेसळ करून मानवी आरोग्याशी खेळणाऱ्या एका मोठ्या आंतरजिल्हा रॅकेटचा धाराशिव अन्न व औषध प्रशासनाने (FDA) पर्दाफाश केला आहे. भूम शहरातील एका ट्रेडिंग कंपनीवर टाकलेल्या छाप्यात तब्बल ६१ गोण्या ‘व्हे पावडर’ (Whey Powder) आणि ‘व्हे परमिएट पावडर’ जप्त करण्यात आली आहे. याप्रकरणी अन्न सुरक्षा अधिकाऱ्यांच्या तक्रारीवरून भूम पोलीस ठाण्यात नामांकित दूध संकलन केंद्रांचे चालक, अकलूज (सोलापूर) आणि भूम येथील व्यापाऱ्यांसह ७ ते ८ जणांवर गंभीर गुन्हे दाखल करण्यात आले आहेत.

‘मधुबन ट्रेडिंग कंपनी’वर एफडीएचा छापा

पोलिसांकडून मिळालेल्या प्राथमिक माहितीनुसार, भूम शहरातील इंदिरा नगर भागात असलेल्या ‘मधुबन ट्रेडिंग कंपनी’मध्ये दुधात भेसळ करण्यासाठी मोठ्या प्रमाणावर प्रतिबंधित किंवा निकृष्ट दर्जाच्या पावडरचा साठा केला गेल्याची गुप्त माहिती अन्न व औषध प्रशासनाला मिळाली होती.

या माहितीच्या आधारे ५ जुलै २०२६ रोजी दुपारी ३:२० वाजण्याच्या सुमारास अन्न सुरक्षा अधिकारी रोहित दिनेश फंदी (वय २६ वर्षे, अन्न व औषध प्रशासन, धाराशिव) यांच्या पथकाने या ठिकाणी धाड टाकली.

१,५०० किलोहून अधिक भेसळयुक्त पावडर जप्त

या छाप्यादरम्यान पथकाला ‘मधुबन ट्रेडिंग कंपनी’च्या गोदामात वेगवेगळ्या सहा ब्रँडच्या एकूण ६१ व्हे पावडर तसेच व्हे परमिएट पावडरच्या गोण्या मिळून आल्या. प्रत्येक गोणीचे वजन २५ किलो असून, एकूण १५२५ किलो वजनाचा हा संशयास्पद साठा जप्त करण्यात आला. ही पावडर दुधाची घनता आणि फॅट (Fat) कृत्रिमरित्या वाढवण्यासाठी दूध संकलन केंद्रांना पुरवली जात असल्याचे तपासात उघड झाले.

अकलूजच्या कंपन्या आणि दूध केंद्रांचे कनेक्शन

तपासात असे समोर आले की, हा भेसळयुक्त माल सोलापूर जिल्ह्यातील अकलूज येथून भूममध्ये आणला गेला होता आणि तिथून तो स्थानिक दूध संकलन केंद्रांना पुरवला जात होता. या रॅकेटमध्ये सहभागी असलेल्या खालील प्रमुख आरोपींवर गुन्हे दाखल करण्यात आले आहेत:

• आरोपींची नावे:

  १) बाळासाहेब मधुकर गोडगे (प्रो.प्रा. मधुबन ट्रेडिंग कंपनी, इंदिरा नगर, भूम)

  २) हेमंत टेके (हेमंत कॉर्पोरेशन, टेकेवाडा, मु.पो. अकलूज, ता. माळशिरस, जि. सोलापूर)

  ३) धर्मराज शिंदे

  ४) गजानन कांबळे

  ५) काकासाहेब डोम्बले

  ६) पल्लवी गजानन कांबळे (प्रो.प्रा. मेम्बाई दूध संकलन केंद्र)

  ७) काशिनाथ आंबदास डोम्बले (प्रो.प्रा. ईश्वरी दूध संकलन केंद्र) व इतर.

भूम पोलिसांत विविध कलमान्वये गुन्हा दाखल

अन्न सुरक्षा अधिकारी रोहित फंदी यांनी ७ जुलै २०२६ रोजी भूम पोलीस ठाण्यात रीतसर प्रथम खबरी अहवाल (FIR) दिला. त्यानुसार पोलिसांनी सर्व आरोपींविरुद्ध भारतीय न्याय संहिता (BNS) कलम ३(५) (समान उद्देश), ६१ (गुन्हेगारी कट रचणे), १११ (जीवितास धोका निर्माण करणारे कृत्य), २७४, २७५ (अन्न-औषधांमधील भेसळ आणि विक्री) सह अन्न सुरक्षा मानके अधिनियम २००६ (Food Safety and Standards Act 2006) चे नियमन २०११ मधील कलम २६, ३७, ३(१)(zz)(iv) आणि ५९ अन्वये गुन्हा नोंदवला आहे.

दूध ग्राहकांच्या आरोग्याशी खेळणारे हे रॅकेट कुठे-कुठे पसरले आहे आणि याद्वारे किती लीटर भेसळयुक्त दूध बाजारात विकले गेले, याचा सखोल तपास भूम पोलीस आणि अन्न व औषध प्रशासन करत आहे.