धाराशिव: शहरातील खिरणीमळा भागात बेकायदेशीररीत्या गोवंशीय मांसाची साठवणूक आणि जनावरांची कत्तल सुरू असल्याची माहिती मिळताच धाराशिव शहर पोलिसांनी छापा टाकला. या कारवाईत पोलिसांनी १२५ किलो गोवंशीय मांसासह जिवंत जनावरे असा एकूण ७० हजार रुपयांचा मुद्देमाल जप्त केला आहे. याप्रकरणी दोघांवर गुन्हा दाखल करण्यात आला आहे.
पोलिसांनी दिलेल्या माहितीनुसार, ही कारवाई १५ फेब्रुवारी २०२६ रोजी सकाळी ७:१५ वाजण्याच्या सुमारास खिरणीमळा, धाराशिव येथे करण्यात आली.
पोलिसांना मिळालेल्या गुप्त माहितीच्या आधारे ही कारवाई करण्यात आली. घटनास्थळी पोलिसांना १२५ किलो गोवंशीय मांस, एक गाय, तीन कालवडी आणि कत्तलीसाठी वापरला जाणारा एक लोखंडी सत्तूर आढळून आला. जनावरांना अत्यंत निर्दयतेने डांबून ठेवल्याचे पोलिसांच्या निदर्शनास आले. या सर्व मुद्देमालाची एकूण किंमत ७०,००० रुपये इतकी आहे.
आरोपींची नावे: १. फुरखान अखलाक कुरेशी (वय ३० वर्षे) २. अय्याज अखलाक कुरेशी (वय ३० वर्षे) (दोघे रा. खिरणीमळा, धाराशिव)
या प्रकरणी पोलिसांनी स्वतः फिर्यादी होत (सरकारतर्फे) वरील आरोपींविरुद्ध धाराशिव शहर पोलीस ठाण्यात गुन्हा नोंदवला आहे. आरोपींवर भारतीय न्याय संहिता (BNS) कलम ३२५, तसेच महाराष्ट्र प्राणी संरक्षण अधिनियम कलम ५(क), ९(अ) आणि प्राण्यांना निर्दयतेने वागविण्यास प्रतिबंध अधिनियम कलम ११(१)(एफ), (एच), (आय) अन्वये कायदेशीर कारवाई करण्यात आली आहे.
वाशी फाटा येथे जनावरांच्या अवैध वाहतुकीवर पोलिसांचा छापा; रिक्षासह २ लाखांचा मुद्देमाल जप्त, एकावर गुन्हा
वाशी: महाराष्ट्र प्राणी संरक्षण कायद्याचे उल्लंघन करून जनावरांची अवैध वाहतूक करणाऱ्या एका ॲपे रिक्षावर वाशी पोलिसांनी धडक कारवाई केली आहे. वाशी फाटा येथे ही कारवाई करण्यात आली असून, पोलिसांनी वाहनासह एकूण २ लाख २ हजार रुपयांचा मुद्देमाल जप्त केला आहे. याप्रकरणी वाशी पोलीस ठाण्यात एका आरोपीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, १५ फेब्रुवारी २०२६ रोजी सकाळी ९:५० वाजण्याच्या सुमारास वाशी फाटा येथे संशयास्पद रित्या जाणारी ॲपे पिॲगो रिक्षा (क्रमांक एमएच २५ एके १०५०) पोलिसांनी अडवली. तपासणी दरम्यान, या वाहनातून कायद्याचे उल्लंघन करून वाहतूक केली जात असल्याचे आढळून आले. पोलिसांनी कारवाईत रिक्षा आणि इतर साहित्य असा एकूण २,०२,००० रुपयांचा मुद्देमाल जप्त केला आहे.
आरोपीचे नाव: रोहन रमेश शिंदे (वय ३८ वर्षे, रा. रविंद्र हायस्कुलच्या पाठीमागे, लक्ष्मी नगर, भूम, ता. भूम, जि. धाराशिव)
सदर आरोपीविरुद्ध वाशी पोलिसांनी स्वतः फिर्यादी होत (सरकारतर्फे) महाराष्ट्र प्राणी संरक्षण अधिनियम कलम ५(क) आणि ९(ब) अन्वये गुन्हा नोंदवला आहे. पुढील तपास वाशी पोलीस करत आहेत.
