येरमाळा : राज्यात प्रतिबंधित असलेल्या गुटखा आणि पानमसाल्याची अवैध विक्री करणाऱ्या चोराखळी (ता. कळंब) येथील एका हॉटेल चालकावर येरमाळा पोलिसांनी कारवाई केली आहे. या छाप्यात पोलिसांनी गुटखा जप्त करून एका तरुणाविरुद्ध गुन्हा दाखल केला आहे.
पोलिसांनी दिलेल्या माहितीनुसार, फेरोज मैतुल्ला सय्यद (वय ३५, मूळ रा. चोराखळी, सध्या रा. धाराशिव साखर कारखाना परिसर) असे आरोपीचे नाव आहे.
३१ जानेवारी २०२६ रोजी दुपारी १:१० वाजेच्या सुमारास येरमाळा पोलिसांच्या पथकाने चोराखळी शिवारात कारवाई केली. धाराशिव साखर कारखान्याजवळ असलेल्या ‘केजीएन हॉटेल’ मध्ये फेरोज सय्यद याने विक्रीसाठी प्रतिबंधित गुटखा साठा बाळगला होता. पोलिसांनी छापा टाकला असता, तिथे १,६०० रुपये किमतीचा विमल पानमसाला, राजनिवास पानमसाला व इतर तंबाखूजन्य पदार्थ आढळून आले.
शासनाने आरोग्यास अपायकारक ठरणाऱ्या या पदार्थांवर बंदी घातली असतानाही आरोपी त्याची चोरून विक्री करत होता. याप्रकरणी पोलिसांनी गुटख्याचा साठा जप्त केला असून, फेरोज सय्यद याच्याविरुद्ध येरमाळा पोलीस ठाण्यात भारतीय न्याय संहिता (B.N.S.) कलम २२३, २७४, २७५ आणि १२३ अन्वये गुन्हा दाखल करण्यात आला आहे.
