सूर्यराजेंच्या खऱ्या ‘बसेस’, साहेबांचा ‘सॉफ्टवेअर’मधला विकास अन् उशिरा आलेल्या पत्रकाराची गुगली!

नमस्कार वाचकहो! धाराशिवच्या राजकीय नाटकात आजचा एपिसोड फुल ‘कॉमेडी आणि सस्पेन्स’ने भरलेला आहे. एकीकडे विधानभवनात आमदार कैलास पर्वांनी ‘मेडिकल कॉलेज’च्या बोगस कागदपत्रांचा पाढा वाचून फेसबुक पिंट्या साहेबांच्या लाडक्या ‘खंडोजी’ कंत्राटदाराचे टेंडर सातारच्या राजांकडून रद्द करवून आणले. यामुळे साहेबांचं टक्केवारीचं पितळ पार उघडं पडलं. पण साहेबांच्या दुखण्यावर खरी मीठ चोळण्याचं काम केलंय ते ‘सूर्यराजेंनी’!

चला तर मग, पाहूया साहेबांच्या नव्या ‘सॉफ्टवेअर’ विकासाची आणि प्रेस कॉन्फरन्समधील फजितीची भन्नाट कहाणी!

१. सूर्यराजे बनले ‘सरकारी पाहुणे’ अन् साहेबांची उडाली झोप!

सूर्यराजे सत्तेत आल्यापासून आता थेट ‘सरकारी पाहुणे’ झाले आहेत. कालपर्यंत फीत कापायला फेसबुक पिंट्या साहेबांना बोलावलं जायचं, तिथे आता सूर्यराजे व्हीआयपी (VIP) म्हणून फिती कापत आहेत!

रविवारी धाराशिवमध्ये सूर्यराजेंच्या हस्ते एसटी महामंडळाच्या ३० नव्याकोऱ्या ‘राजमाता जिजाऊ’ बसेसचे थाटामाटात लोकार्पण झाले. या बसेस आधुनिक सुविधांनी सुसज्ज असून, ३ बाय २ आसन व्यवस्थेसह ५६ प्रवाशांची क्षमता असलेल्या आहेत. सूर्यराजेंनी प्रत्यक्ष जमिनीवर बसेस आणल्या आणि प्रवाशांना दर्जेदार प्रवासाची हमी दिली. इकडे सूर्यराजेंचा हा गवगवा आणि मीडियात आलेली बातमी पाहून, नेहमी प्रसिद्धीच्या झोतात राहण्याची सवय असलेल्या फेसबुक पिंट्या साहेबांच्या पोटात गोळा आला!

२. बातमी झाकण्यासाठी साहेबांचा स्टंट: ‘सॉफ्टवेअर’मधला विकास!

सूर्यराजेंची बातमी दाबण्यासाठी साहेबांनी लगेच आपली आवडती खेळी खेळली—प्रेस कॉन्फरन्स!

साहेबांची एक जुनी सवय आहे, पत्रकारांनी जुन्या घोषणांबद्दल विचारलं की म्हणायचं, “त्यावर आपण वेगळी प्रेस घेऊ,” आणि वेळ मारून न्यायची. पण आज साहेबांनी विकासाचा एक नवाच शोध लावला. साहेब पत्रकारांना म्हणाले, “ज्या ४७ कामांच्या घोषणा मी पूर्वी कागदावर केल्या होत्या, त्या आता ‘सॉफ्टवेअर’मध्ये आहेत!”

म्हणजे जमिनीवर काम सुरू व्हायची तर सोय नाही, पण साहेबांचा विकास आता थेट ‘सॉफ्टवेअर’ आणि कॉम्प्युटरच्या स्क्रीनवर वेगात सुरू झालाय! उद्या साहेब म्हणतील, “मी पेन ड्राईव्हमध्ये तुळजापूरचा विमानतळ पण आणलाय!”

३. प्रामाणिक पत्रकारांचा ‘सायलेंट स्ट्राईक’ आणि उशिरा आलेला ‘हिरो’!

साहेबांच्या या रोजच्या पोकळ गप्पांना वैतागून आज काही प्रामाणिक पत्रकारांनी एक भारी प्लॅन बनवला होता. त्यांनी ठरवलं होतं की, ‘साहेबांचं फक्त ऐकून घ्यायचं आणि एकही प्रश्न न विचारता गुपचूप निघून यायचं!’

साहेबांनी आपलं ‘सॉफ्टवेअर’मधल्या ४७ कामांचं पुराण वाचून संपवलं आणि मोठ्या रुबाबात विचारलं, “काही प्रश्न आहेत का?” सगळे पत्रकार एकदम गप्प! साहेबांना वाटलं, वा! आज आपण सगळ्यांना भारी गप्प केलं.

पण तेवढ्यात तिथे एका पत्रकाराची ‘हिरो’सारखी एन्ट्री झाली! हा पत्रकार थोडा उशिरा आल्यामुळे त्याला बाकी पत्रकारांचा ‘सायलेंट स्ट्राईक’ माहितच नव्हता. त्याने माईक हातात घेतला आणि थेट मेडिकल कॉलेजच्या रद्द झालेल्या टेंडरवर एकामागून एक सलग तीन खडे प्रश्न साहेबांच्या तोंडावर फेकले!

४. आले अंगलट की ढकल अधिकाऱ्यांवर…

उशिरा आलेल्या पत्रकाराने ‘मेडिकल कॉलेज आणि लाडक्या कंत्राटदाराची’ नस दाबताच साहेबांची भंबेरी उडाली. नेहमीप्रमाणे साहेबांनी अत्यंत शिताफीने बगल दिली आणि सरळ हात झटकत म्हणाले, “हे बघा, ते सगळे प्रश्न तुम्ही अधिकाऱ्यांना विचारा!”

वाह रे फेसबुक पिंट्या साहेब! तुमचा नियम किती साधा आणि सोपा आहे:

• काम मंजुरीची बातमी आली की श्रेय घ्यायला साहेब पुढे!

• पण कंत्राटदाराचा भ्रष्टाचार उघड झाला आणि टेंडर रद्द झालं की, ‘आले अंगलट की ढकल अधिकाऱ्यांवर!’

धाराशिवकरांनो, सूर्यराजे प्रत्यक्ष रस्त्यावर बसेस धावायला लावत आहेत आणि आमचे फेसबुक पिंट्या साहेब ‘सॉफ्टवेअर’मध्ये ४७ कामे पूर्ण करत आहेत. साहेबांच्या या व्हर्च्युअल (Virtual) विकासाला आता अधिकाऱ्यांनीच उत्तर द्यायचं बाकी आहे!